Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 796 Hüküm no: 1326 Orijinal metin no: [110a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Debbağ Hafız İbrahim’in sattığı eşya bedelinden alacağı olduğu Ma‘rûz Mahrûse-i Galata muzâfâtından kasaba-i Kasımpaşa’da sâkin Debbâğ Hafız İbrahim b. el-Hâc Mehmed nâm kimesne medîne-i Üsküdar’da mahfil-i Bâb’da meclis-i şer‘-i hatîrde tüccâr tâifesinden Petyan nâm-ı diğer Bedros v. Yasef nâm zimmî muvâcehesinde merkūm Petyan Bedros zimmî bin iki yüz dört senesi Şevvâli’l-mükerrem’in on yedinci günü târihiyle müverrah bir kıt‘a temessük nâtık olduğu üzere yedimden iştirâ ve kabz eylediği bir aded semmûr kürk yaka zağrası ve bir cild-kafa kürk ve bir donluk şal ve bir çift sîmli piştov ve iki tüfenk semenlerinden bin beş yüz guruş hakkım olmağla taleb ederim deyü takrîrine mutâbık ve târih-i merkūm ile müverrah bir kıt‘a deyn temessüğü ibrâzıyla da‘vâ ve merkūm Petyan Bedros zimmî cevâbında fi’l-hakīka müdde‘î-i merkūma cihet-i mezkûreden ol-mikdâr deyni olduğunu ikrâr lâkin meblağ-ı merkūmun iki yüz elli guruşunu kendiye edâ ve teslîm ve temessük-i mezkûr zahrına tahrîr olunmuşdu deyicek müdde‘î-i merkūm cevâbında bundan akdem ben meblağ-ı merkūmu merkūm Petyan Bedros zimmîden mutâlebe esnâsında merkūm Petyan Bedros zimmînin rüfekāsından ismi ma‘lûmum olmayan bir kimesne temessük-i mezkûru yedimden fuzûlî ahz ve temessük-i mezkûr zahrına tahrîr etmişdi deyü meblağ-ı merkūm iki yüz elli guruşun kabzını inkâr etmeğin merkūm Petyan Bedros zimmî def‘-i mezkûrunu beyâna ba‘de’l-havâle ancak mertebe-i ikrârı olan meblağ-ı bâkī-i merkūm bin iki yüz elli guruşun edâsıyla merkūm Petyan Bedros zimmî şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî-min Zilhicce sene 1206.