Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 797 Hüküm no: 1328 Orijinal metin no: [110b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Marko’nun kefaletinden dolayı alacağı olduğu Ma‘rûz Mahrûse-i Galata muzâfâtından Kandilli kasabasında mütemekkin Bakkāl Marko v. Pavli nâm zimmî medîne-i Üsküdar’da meclis-i şer‘-i hatîrde Tanaş v. Petros nâm zimmî muvâcehesinde merkūm Tanaş zimmî zimmetinde işbu yedimde olan bir kıt‘a temessük mantûkunca cihet-i kefâletden üç yüz guruş hakkımın yüz elli guruşu ahz bâkī yüz elli guruşu zimmetinde kalmağla taleb ederim deyü da‘vâ ve merkūm Tanaş zimmî cevâbında cihet-i mezkûreden bâkī ol-mikdâr deyni olduğunu ikrâr lâkin müdde‘î-i merkūm kabzını mu‘terif olduğu yüz elli guruşdan mâ‘adâ yirmi guruşu dahi teslîm edip ancak yüz otuz guruş zimmetimde deynim bâkī kalmışdı deyü ba‘de’d-def‘ ve’l-inkâr merkūm Tanaş zimmî def‘-i mezkûrunu beyân edemeyip müdde‘î-i merkūma yemîn teklif olundukda yemînden nükûl etmeğin mûcibiyle müdde‘î-i merkūm yirmi guruş için mu‘ârazadan ba‘de’l-men‘ mertebe-i ikrârı olan yüz otuz guruşu müdde‘î-i merkūma edâ ve teslîme merkūm Tanaş zimmîye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 5 min-Za sene 1206.