Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 798 Hüküm no: 1330 Orijinal metin no: [110b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Mehmed’in satın aldığını iddia ettiği gedik için verdiği ücreti kendisine iade etmesi talebiyle Seyyid Mehmed aleyhine açtığı davada iddiasını ispat edemediği Ma‘rûz Medîne-i Üsküdar’da Debbâğhâne’de sâkin Ali b. Mehmed nâm kimesne medîne-i mezbûrede mahfil-i Bâb’da meclis-i şer‘-i hatîrde es-Seyyid Mehmed b. Mustafa nâm kimesne mahzarında târih-i i‘lâmdan dört sene mukaddem medîne-i mezbûrede arasta kurbünde vâki‘ taht-ı icâresinde olan bir bâb kahveci dükkânı derûnunda mevcûd bâ-defter-i müfredât emlâkinden eşyâ-i ma‘lûmesini dükkân-ı mezkûrda gediğimdir deyü gedik lafzını müş‘ir mutasarrıfı imzâsıyla mümzâ ve mahtûm bir kıt‘a temessüğünü yüz altmış guruş semen tesmiyesiyle bana bey‘ ve teslîm eyledikde ben dahi ber-vech-i muharrer iştirâ ve kabûl etmişdim. Lâkin ben sefer-i hümâyûnda iken dükkân-ı mezkûrun mutasarrıfı olan işbu hâzır bi’l-meclis Ahmed Beşe b. Ali nâm kimesne dükkân-ı mezkûru Mustafa Ağa nâm kimesneye bâ-ma‘rifet-i mütevellî ferâğ etmekle hâlâ dükkân-ı mezkûrda mezbûr Mustafa Ağa sâkin olup beni ber-vech-i muharrer gedik tasarrufundan men‘ eylediğinden mâ‘adâ dükkân-ı mezkûrun gediği esnâf-ı mezbûre beynlerinde mu‘teber dahi olmamağla medfû‘um olan meblağ-ı merkūm yüz altmış guruşu istirdâd ederim deyü da‘vâ ol dahi cevâbında fi’l-hakīka zikr olunan gediği ber-vech-i muharrer yüz altmış guruş semen-i makbûza bey‘ini ikrâr lâkin hîn-i bey‘de mezbûr Ali meblağ-ı mezkûrun gabn [ve] tağrîrine ve meblağ-ı mezkûra ve bi’l-cümle gedik husûsuna müte‘allika âmme-i de‘âvîden zimmetimi ibrâ etmişdi deyü eylediği def‘ini lede’t-tezkiye adâletleri zâhir olan Osman Beşe b. Hasan ve es-Seyyid Ali b. Mustafa ve es-Seyyid Hüseyin b. Halil nâm kimesneler şehâdetleriyle vech-i şer‘î üzere müdde‘î-i mezbûr muvâcehesinde isbât etmeğin mûcibiyle müdde‘î-i mezbûr husûs-ı mezkûrda mezbûr es-Seyyid Mehmed’e bî-vech-i şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 15 min-Za sene 1206.