Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 799 Hüküm no: 1331 Orijinal metin no: [110b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla İbrahim’in kendisini bıçakla yaraladığı iddiasıyla Seyyid Halil aleyhine açtığı davada sulh olduğu Ma‘rûz Medîne-i Üsküdar’da Toygar Hamza mahallesinde sâkin ve ber-vech-i âtî Yatağan bıçağı arkasıyla kara bere idiği lede’l-keşf ve’l-mu‘âyene zâhir olan Molla İbrahim b. İbrahim mahfil-i Bâb’da meclis-i şer‘-i hatîrde es-Seyyid Halil b. Hüseyin mahzarında mezbûr es-Seyyid Halil târih-i i‘lâmdan bir gün mukaddem Tenbel el-Hâc Mehmed mahallesinde Karakādı Câmi‘-i şerîfi önünde vâki‘ dükkânıma gelip vakt-i mağribde bi-gayrı hakkın bıçak arkasıyla sol küreğim üzerine ve sol kolum bâzûsuna darb ve kara bere eylediğinden mâ‘adâ dükkânımda şişelerimi kesr etmekle mûcibini taleb ederim deyü da‘vâ ve mezbûr es-Seyyid Halil cevâbında müdde‘î-i mezbûrun ber-vech-i muharrer müdde‘âsını inkâr lâkin müdde‘î-i mezbûr hâzır bi’l-meclis sagīr oğlum es-Seyyid Osman’a fi‘il-i şenî‘ kasd eylediği ma‘lûmum oldukda bir sille vurmuşdum deyü ikrâr ve mezbûr es-Seyyid Halil’e ta‘zîr lâzım gelmişdi el-hâletü hâzihî beynlerine muslihûn tavassut edip müdde‘î-i mezbûr eylediği da‘vâsından yedi guruş bedel-i makbûz mukābilesinde mezbûr es-Seyyid Halil ile sulh olup husûs-ı mezkûra müte‘allika âmme-i de‘âvîden mezbûr es-Seyyid Halil’in zimmetini ve mezbûr es-Seyyid Halil dahi sagīr-i mezbûrun fi‘il-i şenî‘ nizâ‘ına müte‘allika âmme-i de‘âvîden müdde‘î-i mezbûrun zimmetini ibrâ ve herbiri âharın ibrâsını ba‘de’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 6 min-Za sene 1206.