Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 800 Hüküm no: 1333 Orijinal metin no: [110b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çırağı İbrahim Edhem’in uygunsuz hareketlerine engel olmayan Berber Ahmed’in meslekten çıkarılmasının istendiği Ma‘rûz Medîne-i Üsküdar’da berber esnâfının kethudâları Mehmed Ataullah b. el-Hâc Ali ve Yiğitbaşı Hüseyin b. Ahmed ve ustalarından İbrahim b. Yusuf ve Mustafa b. Feyzullah ve diğer İbrahim b. Ahmed ve diğer İbrahim b. Mehmed ve es-Seyyid Hasan b. Ahmed ve Ahmed b. Mehmed ve Hasan b. Hasan nâm kimesneler medîne-i mezbûrede mahfil-i Bâb’da meclis-i şer‘-i hatîrde Tabutcular sûkunda kâin berber Ahmed b. Ömer nâm kimesne mahzarında mezbûr Berber Ahmed’in şâkirdi gāib ani’l-meclis İbrahim Edhem kendi hâlinde olmayıp hilâf-ı rızâmız olan mahallerde geşt ü güzâr ve mezbûr Ahmed dahi terbiye edemeyip muhâfazasında tekâsülünden nâşi esnâfımızı lisâna getirip kendiye nush ü pend olundukda mütenassıh olmadığından gayrı umûr-ı müttehemeden itinâsı olmayıp ol-vechile nizâmımızın ihtilâline bâdî olmağla emn ü rahatımız meslûb olmuşdur deyü teşekkî ve mezbûrûndan herbiri mezbûr Ahmed’in esnâf-ı mezkûreden ihrâcını istid‘â eyledikleri bi’l-iltimâs huzûr-ı âlîlerine i‘lâm olundu. Fî 8 min-Z sene 1206.