Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 801 Hüküm no: 1335 Orijinal metin no: [111a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Hüseyin’in eski damadından mehir bedeli ve satın aldığı eşyaların iadesi talebiyle açtığı davada sulh olduğu Ma‘rûz Medîne-i Üsküdar’da Selmanağa mahallesinde sâkine mu‘arrefetü’z-zât Havva bt. Hüseyin nâm hatun meclis-i şer‘-i hatîrde sâbıkā dâmâdı es-Seyyid Süleyman b. es-Seyyid Osman nâm kimesne mahzarında mezbûr es-Seyyid Süleyman kızım hâzıra bi’l-meclis Şerife Hafize Hatun ile beynlerinde zevciyet kāime iken kızım mezbûrenin kendi eşyâsı ile hîn-i akdde mehr-i mu‘accel nâmıyla tesmiye olunan üç minder ve bir şilte ve altı yasdık ve bir baş yasdığı ve bir yüz yasdığı ve iki çuka mak‘ad ve bir hasır ve bir orta keçesi ve iki yorgan ve bir kapı perdesi ve bir mangal ve bir leğen ma‘a ibrik ve iki tencere ve dört sahan ve bir tâbe ve bir sini ve bir şorba tası ve bir lenger ve beş makrame ve beş âbdest havlusu ve beş entari ve üç hırka ve iki yağlık ve iki şalvar ve bir tahta papucu ve bir çevre ve bir kat‘ cam takımı ve üç boğça ve bir hırka ve iki çârşeb ve beş değirmi yemeni ve def‘a bir yorgan ve def‘a bir baş yasdığı ve iki fincan ve def‘a üç sahan ve bir maşraba ve üç şamdan ve bir fağfûrî tabağını bana bâ-hüccet-i şer‘iye semen-i makbûza bey‘ ben dahi ba‘de’l-iştirâ ve’l-kabûl eşyâ-i mezkûre mezbûr es-Seyyid Süleyman menzilinde olmağla bana teslîme tenbîh olunmak matlûbumdur deyü eylediği da‘vâsından bâ-tavassut-ı muslihîn kırk guruş bedel-i makbûza mezbûr es-Seyyid Süleyman ile sulh olup eşyâ-i mezkûreye ve ziyâde kıymetlerine ve bi’l-cümle husûs-ı mezkûra müte‘allika âmme-i de‘âvîden mezbûr es-Seyyid Süleyman’ın zimmetini ibrâ ve ıskāt eylediğinde ol dahi ibrâsını kabûl ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 17 min-Za sene 1206.