Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 801 Hüküm no: 1336 Orijinal metin no: [111a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Abdullah’ın küçük kızı Garime’nin bebeklikten çıkana kadar annesi ve eski karısı Hanife bt. Hasan’ın yanında kalmasına razı olduğu Ma‘rûz Mahmiye-i İslâmbol’da Sultanahmed kurbünde sâkin Mustafa b. Abdullah nâm kimesne medîne-i Üsküdar’da mahfil-i Bâb’da meclis-i şer‘-i hatîrde mu‘arrefetü’z-zât Hanife bt. Hasan nâm hatun mahzarında mezbûre Hanife’nin zevc-i evveli es-Seyyid Ahmed b. Mustafa nâm kimesne hâzır olduğu hâlde mezbûre Hanife Hatun kırk guruş mehr-i müeccel tesmiyesiyle mezbûr es-Seyyid Ahmed’in zevce-i menkûhası iken târih-i i‘lâmdan iki sene mukaddem mezbûr es-Seyyid Ahmed sefer-i hümâyûnda muhârebede esir olmağla fevt oldu deyü ba‘de’l-ihbâr iddeti münkaziye oldukdan sonra on guruş mehir tesmiyesiyle nefsini bana tezvîc ve inkâh edip hâlâ mezbûr es-Seyyid Ahmed mezbûre Hanife’nin zevci olduğunu vech-i şer‘î üzere isbât ve beynimizde olan akd-i mezbûrun fesâdına binâen münfesih ve tefrîk olunup lâkin benim firâşımdan hâsıl ve mezbûre Hanife’den mütevellide kızım Garime nâm sagīre hâlâ vâlidesi yanında olup ve zevc-i evveli mezbûr es-Seyyid Ahmed dahi sagīre-i mezbûreye ecnebî olmağla sagīre-i mezbûreyi taleb ederim deyü da‘vâ ve beynlerinde ba‘de vukū‘i’l-münâza‘a beynlerine muslihûn tavassut edip mezbûrân Hanife ve es-Seyyid Ahmed müdde‘î-i zevc-i sânî-i mezbûr Mustafa’dan sagīre-i mezbûre için nafaka ve kisve-bahâ mutâlebe etmeyip herbiri kendi mâllarından infâk ve iksâ etmek üzere ta‘ahhüd eylediklerinde mezbûre Mustafa dahi sagīre-i mezbûreyi anası mezbûre Emine Hatun yanında hıdânesi sükûtuna değin terk ve ibkā edip bu vechile beynleri tevfîk olunduğu bi’l-iltimâs huzûr-ı âlîlerine i‘lâm olundu. Fî 25 min-Za sene 1206.