Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 802 Hüküm no: 1338 Orijinal metin no: [111a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çengelköy’de denizde boğulan Seyyid Ali’nin cesedinin incelenerek defnine izin verildiği Ma‘rûz Sâdır olan fermân-ı âlîlerine imtisâlen kıbel-i şer‘-i şerîfden meb‘ûs Ali Efendi dâ‘îleri ve izzetli bostancıbaşı ağa tarafından müte‘ayyin Mustafa Haseki ve Kule Bağçesi ustası ve Çenger karyesi subaşısı ve sâir mazbûtü’l-esâmî Müslimîn ile medîne-i Üsküdar’a tâbi‘ mârrü’z-zikr Çenger karyesinde Dereağzı nâm mahâlde deryâ kenârında garîkan fevt olan es-Seyyid Ali b. Abdullah’ın üzerine varıp garîk-i mezbûrun li-ebeveyn er karındaşı olup kendi nefsinden asâleten ve vâlidesi Hadice bt. el-Hâc Ali ve kız karındaşı Şerife Fatıma nâm hatunlar taraflarından ber-vech-i âtî vekîlleri olduğu zât-ı mezbûretânı bi’l-mu‘arrefeti’ş-şer‘iye ârifân Ahmed Ağa b. el-Hâc osman ve Bostanî Abdullah Ağa b. el-Hâc Ali nâm kimesneler şehâdetleriyle sâbit olan es-Seyyid Hasan nâm kimesne vekâleten karındaşım mezbûr es-Seyyid Ali târih-i i‘lâmdan bir gün mukaddem vakt-i asrda mahâll-i merkūmda kimesnenin sun‘u olmaksızın gasl için deryaya girip bi-kazâillâhi te‘âlâ garîkan vefât etmekle kimesne ile da‘vâ ve nizâ‘ımız olmayıp kıbel-i şer‘den keşif ve mu‘âyene olunmak asâleten ve vekâleten matlûbumdur dedikde garîk-i mezbûrun a‘zâsına nazar olundukda eser-i cerh ve hank misillü nesnesi olmayıp ancak garîkan vefât eylediği ba‘de’l-keşf ve’l-mu‘âyene defnine izin birle vâki‘ hâli mezbûr dâ‘îleri mahâllinde ba‘de’t-tahrîr ve’l-inhâ mübâşir haseki kulları iltimâsıyla huzûr-ı âlîlerine i‘lâm olundu. Fî 11 min-Z sene 1206.