Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 804 Hüküm no: 1341 Orijinal metin no: [111b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uygunsuz hareketlerinden şikâyet edilen Zeynep bt. Hacı Mustafa’nın mahalleden çıkarılmasının istendiği Ma‘rûz Bi’l-iltimâs kıbel-i şer‘den meb‘ûs Mehmed Esad Efendi dâ‘îleri medîne-i Üsküdar’a tâbi‘ Kādı karyesinde Kapıağası mahallesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde mahalle-i mezbûre imâmı Mehmed Efendi b. Mustafa ve ahâlisinden el-Hâc Mehmed Ağa b. Ali ve Abdi Efendi b. el-Hâc İbrahim ve es-Seyyid İbrahim Efendi b. Mustafa ve Süleyman Ağa b. Ali ve Ahmed Efendi b. Osman ve Mehmed Salih Ağa b. Ahmed ve Haseki Mahmud Ağa b. Hüseyin ve Ahmed Beşe b. Mehmed ve es-Seyyid Mustafa b. Halil ve Hasan Beşe b. Ali ve Mustafa Beşe b. Halil ve Mehmed Beşe b. Mustafa ve Osman b. Ali ve Ali Efendi b. Mustafa nâm kimesneler meclis-i ma‘kūd-ı mezkûrda Kırmızıkızı demekle arîfe Zeyneb bt. el-Hâc Mustafa nâm hatun mahzarında mezbûre Zeyneb hadîdetü’l-lisân ve nâ-mahremden ictinâbı olmayıp mekşûfetü’l-vech ve’l-a‘zâ menzili kapısında durup kendiye nush ü pend olundukda mütenassıha ve mütenebbihe olmadığından mâ‘adâ herbirimizi vesâtet töhmetiyle ithâm ve dâimâ mûcib-i ta‘zîr olur elfâz-ı kabîha ile şetm ve hetk-i ırz âdet-i müstemirresi olup hattâ hâzır bi’l-meclis Osman Efendi’ye kayınvâlidesine zinâ eder deyü ifk ü iftirâ edip bu vechile mezbûre Zeyneb’in şerr u mazarratından hâb ü rahatımız külliyen meslûb olmuşdur deyü sû’-i hâlini muvâcehesinde ihbâr ve mahalle-i mezbûreden ihrâcı bâbında emr-i âlîleri sudûrunu ahâli-i mezbûrûndan herbiri istid‘â eylediklerini mezbûr dâ‘îleri mahâllinde ba‘de’t-tahrîr ve’l-inhâ huzûr-ı âlîlerine i‘lâm olundu. Fî 14 min-Z sene 1206.