Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 806 Hüküm no: 1344 Orijinal metin no: [111b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. Abdullah’ın eşya rehin vererek borç para aldığı Ahmed b. Mehmed ile sulh olduğu Ma‘rûz Medîne-i Üsküdar’a muzâfe Adalar nâhiyesine tâbi‘ Dolayoba karyesinde sâkine mu‘arrefetü’z-zât sâhibe-i arzuhâl İsmihan bt. Abdullah nâm hatun medîne-i mezbûrede mahfil-i Bâb’da meclis-i şer‘-i hatîrde arzuhâlde ismi mezkûr Ahmed b. Mehmed nâm kimesne mahzarında târih-i i‘lâmdan yedi ay mukaddem mezbûr Ahmed yedinden istikrâz eylediğim dokuz guruş deynimiz mukābilesinde kırk beş guruş kıymetli bir çift altın kuşak ve dört guruş kıymetli bir kazgan ve beş guruş kıymetli iki müsta‘mel bez gömlek ve beş guruş kıymetli bir bez gömlek ki cem‘an elli dokuz guruş kıymetli eşyâmı rehin vaz‘ etmemle meblağ-ı merkūm dokuz guruşu ahz ve rihân-ı mezkûru bana teslîme mezbûr Ahmed Beşe’ye tenbîh olunmak matlûbumdur deyü da‘vâ ve mezbûr Ahmed Beşe cevâbında rihân olmak üzere kıymetleri on sekiz guruşa bâliğ bir çift altın kuşak ve iki biz gömleği kabzını ikrâr ziyâde kıymetleri olan otuz iki guruş ile bir gömlek ve bir kazganı inkârından mâ‘adâ müdde‘iye-i mezbûrenin sulbiye kebîre kızı işbu hâzıra bi’l-meclis Hadice bt. Halil’e müdde‘iye-i mezbûrenin emriyle rihân-ı mezkûru teslîm etmişdim deyü mezbûr Ahmed Beşe def‘-i mezkûrunu isbâtdan acz birle ba‘de’t-tahlîfi’ş-şer‘î müdde‘iye-i mezbûre ziyâde müdde‘âsı olan bir bürüncek gömlek ve bir kazganı ve ziyâde kıymetlerini beyân esnâsında beynlerine muslihûn tavassut edip müdde‘iye-i mezbûre da‘vâ-yı mezkûresinden [112a] deyn-i mezkûr dokuz guruşa on beş guruş zammıyla cem‘an yirmi dört guruş bedel-i makbûza sulh olup zikr olunan eşyâlara ve ziyâde kıymetlerine ve bi’l-cümle husûs-ı mezkûra müte‘allika âmme-i de‘âvîden mezbûr Ahmed Beşe’nin zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 10 min-Şevvâl sene 1206.