Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 806 Hüküm no: 1345 Orijinal metin no: [112a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe b. Mehmed’in alacak davasındaki sulh bedelini altı ay içeresinde ödemeye Hadice bt. Halil tarafından söz verildiği Ma‘rûz Medîne-i Üsküdar’a muzâfe Adalar nâhiyesine tâbi‘ Dolayoba karyesinde sâkin Ahmed Beşe b. Mehmed nâm kimesne medîne-i mezbûrede mahfil-i Bâb’da meclis-i şer‘-i hatîrde mu‘arrefetü’z-zât Hadice bt. Halil nâm hatun mahzarında mezbûre Hadice Hatun târih-i i‘lâmdan yedi ay mukaddem vâlidesi işbu hâzıra bi’l-meclis İsmihan bt. Abdullah nâm hatun yedimden istikrâz eylediği dokuz guruş deyni mukābilesinde bir çift altın kuşak ve iki bez gömleği rihân vaz‘ edip ba‘dehû mezbûre Hadice deyn-i mezkûr dokuz guruşu bana teslîm ve rihân-ı mezkûru yedimden fuzûlî ahz eyledikden sonra vâlidesi mezbûre Zeyneb Hatun rihân-ı mezbûru şer‘an benden taleb ve da‘vâ ve ba‘de vukū‘i’l-münâza‘a deyn-i mezkûr dokuz guruş üzerine on beş guruş zammıyla cem‘an yirmi dört guruş bedel-i makbûz mukābilesinde benim ile sulh olup ben dahi sulhu ba‘de’l-kabûl lâkin bedel-i sulh-ı merkūm yirmi dört guruşun mukaddemâ mezbûre Hadice Hatun yedinden makbûzum olan dokuz guruşu deyn-i mezkûra ba‘de’l-mahsûb bâkī on beş guruşu mezbûre Hadice Hatun’dan bi’l-mürâca‘a taleb ederim deyü da‘vâ ve mezbûre Hadice Hatun müdde‘î-i mezbûrun ber-vech-i muharrer takrîrini tasdîk ve bedel-i sulh-ı merkūm on beş guruşu târih-i i‘lâmdan altı ay tamamında bi’t-terâzî edâya ta‘ahhüd ve müdde‘î-i mezbûr Ahmed Beşe dahi râzı olup bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 10 min-L sene 1206.