Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 807 Hüküm no: 1346 Orijinal metin no: [112a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bedros v. Agop’un oğlu Dragos’u tekmeleyerek yaralayan atın sahibi aleyhine açtığı davada sulh olduğu Ma‘rûz Medîne-i Üsküdar’da Büyük İskele’de kâin Koltuk Hanı’nda mütemekkin olup ber-vech-i âtî at depmesiyle meşcûc ve kara bere idiği lede’l-keşf ve’l-mu‘âyene zâhir olan Dragos nâm zimmînin babası ve tarafından sulh ve ibrâya vekîl olduğu Ahmed Beşe b. Ali ve Süleyman b. Mehmed nâm kimesneler şehâdetleriyle sâbit olan babası Bedros v. Agop nâm zimmî meclis-i şer‘-i hatîrde Bârgirci Mehmed b. Abdulkadir mahzarında mezbûr Mehmed bârgirini ismi ma‘lûmum olmayan takrîben sekiz yaşında bir sagīre teslîm ve sagīr-i mezbûrun yedinden bârgir-i mezkûr boşanıp medîne-i mezbûrede Kassâm Çeşmesi nâm mahâlden giderken depmesiyle oğlum müvekkil-i merkūm Dragos zimmî başının iki yerinden darb ve meşcûc ve arkası kara bere olmağla mûcib-i şer‘îsini bi’l-vekâle taleb ederim deyü eylediği da‘vâsından bâ-tavassut-ı muslihîn mezbûr Mehmed ile on sekiz guruş bedel-i makbûza sulh olup cerh-i mezkûra ve mâ-yuhdesü-minhe müte‘allika âmme-i de‘âvîden mezbûr Mehmed’in zimmetini bi’l-vekâle ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 15 min-Za sene 1206.