Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 807 Hüküm no: 1347 Orijinal metin no: [112a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamal Hüseyin b. Mustafa’nın alacağı olduğu Ma‘rûz Medîne-i Üsküdar’da Büyük İskele’de sâkin Hammâl Hüseyin b. Mustafa nâm kimesne medîne-i mezbûrede mahfil-i Bâb’da meclis-i şer‘-i hatîrde Osman b. Mehmed mahzarında mezbûr Osman târih-i i‘lâmdan yirmi beş ay mukaddem bâ-temessük yedimden istidâne ve kabz eylediği kırk guruş ve bilâ-devr-i şer‘î ribâ olmak üzere on altı buçuk guruş ki cem‘an elli altı buçuk guruşun yirmi beş buçuk guruş ahz otuz bir guruşu taleb ederim deyü takrîri üzere tasaddî eylediği bilâ-devr on altı buçuk guruş ribâ da‘vâsı meşrû‘a olmamağla müdde‘î-i mezbûr bî-vech mu‘ârazadan ba‘de’l-men‘ ziyâde müdde‘âsı olan on dört buçuk guruş müdde‘î-i mezbûra deyni olduğunu mezbûr Osman ikrâr ve i‘tirâf edip lâkin müdde‘î-i merkūmun kabzını mu‘terif olduğu yirmi beş buçuk guruşdan mâ‘adâ on dört buçuk guruş dahi teslîm etmişdim deyü ba‘de’d-def‘ ve’l-inkâr mezbûr Osman def‘-i mezkûrunu beyândan izhâr-ı acz birle bi’t-taleb müdde‘î-i mezbûr gıbbe’t-tahlîfi’ş-şer‘î mûcibiyle meblağ-ı bâkī-i merkūm on dört buçuk guruşu müdde‘î-i mezbûra edâ ve teslîme mezbûr Osman’a şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 14 min-L sene 1206.