Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 810 Hüküm no: 1353 Orijinal metin no: [112b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uygunsuz hareketleri görülen Emine ve annesi Kezban’ın mahalleden çıkarılmasının istendiği Ma‘rûz Medîne-i Üsküdar’da Selmanağa mahallesi imâmı Mehmed Ârif Efendi b. Mustafa ve Müezzin Hafız İbrahim b. Hüseyin ve cemâ‘atinden Ders-i âm Ahmed Efendi b. Ömer ve eş-Şeyh Mehmed Said Efendi b. eş-Şeyh Mustafa ve Ahmed Fehim Efendi b. Abdullah ve Molla Ahmed b. Mehmed ve es-Seyyid Numan Ağa b. Abdülgani ve es-Seyyid Mehmed Ağa b. Hasan ve el-Hâc Mehmed Ağa b. Ahmed ve İslâm Beşe b. Bektaş ve Mehmed Emin Ağa b. Ahmed ve Ahmed Beşe b. Mustafa ve Kürkçü Mehmed Emin Ağa b. Mustafa ve el-Hâc Ali Ağa b. Ahmed nâm kimesneler medîne-i mezbûrede mahfil-i Bâb’da meclis-i şer‘-i hatîrde mahalle-i mezbûre sâkinelerinden zâtları mu‘arrefe Emine bt. Ebûbekir ve anası Kezban bt. Mehmed nâm hatunlar mahzarlarında mezbûretân Emine ve Kezban kendi hâllerinde olmayıp dâimâ menzillerinde mechûlü’l-ahvâl avratlar ile ihtilât ve oğlu hâzır bi’l-meclis İsmail b. Hüseyin vesâtet edip bu misillü ef‘âl-i şenî‘ayı mürtekibler olup kendilere nush ü pend eylediğimizde mütenassıhlar olmadıklarından mâ‘adâ hadîdü’l-lisân olup herbirimize mûcib-i ta‘zîr olur elfâz-ı kabîha ile şetm ve ırzımızı hetk etmeleriyle hâb ü rahatımız meslûb olmuşdur deyü sû’-i hâllerini muvâcehelerinde ihbâr ve mahalle-i mezbûreden ihrâcları bâbında emr-i âlîleri sudûrunu ahâli-i mezbûrûndan herbiri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 18 min-Z sene 1206.