Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 811 Hüküm no: 1355 Orijinal metin no: [112b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kezban bt. Süleyman’ın damadı Musa’dan alacağı olduğu Ma‘rûz Medîne-i Üsküdar’da Vâlide-i Atik mahallesinde sâkine mu‘arrefetü’z-zât Kezban bt. Süleyman nâm hatun medîne-i mezbûrede mahfil-i Bâb’da meclis-i şer‘-i hatîrde hâlâ dâmâdı Musa b. Süleyman nâm kimesne mahzarında mezbûr Musa târih-i i‘lâmdan iki sene mukaddem yedimden istidâne ve kabz ve umûruna sarfla istihlâk eylediği doksan guruş zimmetinde hakkım olmağla taleb ederim deyü da‘vâ ve mezbûr Musa cevâbında müdde‘iye-i mezbûreye ol-mikdâr deyni olduğunu ikrâr lâkin müdde‘iye-i mezbûrenin sâbıkā dâmâdı Ahmed ile kızının beynlerinde olan münâza‘aları müdde‘iye-i mezbûrenin emri olmaksızın mezbûr Ahmed’e bi-tarîki’s-sulh on guruş teslîm edip seksen guruş zimmetimde deynim bâkī kalmışdı deyü takrîri üzere bilâ-emr on guruş da‘vâsı mesmû‘a olmayıp mûcibiyle meblağ-ı mecmû‘-ı merkūm doksan guruşun edâsıyla mezbûr Musa şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 9 min-Z sene 1206.