Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 812 Hüküm no: 1357 Orijinal metin no: [113a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Hasan’ın oğlu Hasan’ı döverek yarayalan Basmacı Çalık Mehmed aleyhine açtığı davada sulh olduğu Ma‘rûz Medîne-i Üsküdar’da Kādıasker mahallesinde sâkin olup ber-vech-i âtî kara bere idiği lede’l-keşf ve’l-mu‘âyene zâhir olan Hasan nâm sagīrin babası ve velisi Hüseyin b. Hasan medîne-i mezbûrede meclis-i şer‘[de] Basmacı Çalık Mehmed b. Abdullah nâm kimesne tarafından ber-vech-i âtî tasdîka vekîl olan Mehmed Emin Efendi b. el-Hâc Osman mahzarında müvekkil-i mezbûr Mehmed târih-i i‘lâmdan sekiz gün mukaddem oğlum sagīr-i mezbûr Hasan’ı mahalle-i mezbûrede bi-gayrı hakkın depme ve yumruk ile beline ve arkasına darb ve kara bere etmekle mûcib-i şer‘îsini bi’l-velâye taleb ederim deyü müdde‘î-i mezbûr Hüseyin ber-vech-i muharrer tasaddî eylediği da‘vâsından yirmi guruş bedel-i makbûza sulh olup kara bereye ve mâ-yuhdesü-minhe müte‘allika âmme-i de‘âvîden müvekkil-i mezbûr Mehmed’in zimmetini ba‘de’l-ibrâ ve’l-kabûl bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 17 min-Zilhicce sene 1206.