Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 812 Hüküm no: 1358 Orijinal metin no: [113a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Arnavut Hüseyin tarafından dövülerek öldürülen Mehmed Arif’in cesedinin incelenerek defnine izin verildiği Ma‘rûz Bi’l-iltimâs kıbel-i şer‘-i şerîfden meb‘ûs Ali Efendi dâ‘îleri ve Salacak ustası ve sâir mazbûtü’l-esâmî Müslimîn ile medîne-i Üsküdar’da Sinanpaşa mahallesinde vâki‘ depme ve yumruk darbından vefât eden Mehmed Ârif b. Hasan nâm sagīr-i meyyitin sâkin olduğu menzile varıp akd-i meclis-i şer‘-i şerîf etdikde müteveffâ-yı mezbûrun vâlidesi Âişe bt. Mustafa ve li-üm kız karındaşı Âkile bt. Ahmed nâm hatunlar meclis-i ma‘kūd-ı mezkûrda herbiri bast-ı kelâm ve ifâde-i merâm edip mûrisimiz müteveffâ-yı mezbûr sagīr Mehmed Ârif’i târih-i i‘lâmdan beş gün mukaddem medîne-i mezbûrede Salacak Ocağı neferâtından gāib ani’l-meclis Bostanî Arnabud Hüseyin nâm kimesne mârrü’z-zikr Salacak İskelesi’nde bi-gayrı hakkın depme ve yumruk ile başına ve boynuna ve göbeği üzerine ve a‘zâ-i sâiresine darb ve kara bere etmekle darbından nâşi mûrisimiz müteveffâ-yı mezbûr sagīr-i mezbûr Mehmed Ârif beş gün mürurunda müte’essiren fevt olmağla keşfolunmak matlûbumuzdur dediklerinde mezbûrun a‘zâsına nazar eylediklerinde fi’l-hakīka sagīr-i mezbûrun başı ve boynu ve göbeği üzeri ve a‘zâ-i sâiresi kara bere olduğu hâlde fevt olduğu ba‘de’l-keşf ve’l-mu‘âyene defnine izin verdiğini mezbûr dâ‘îleri mahâllinde ba‘de’t-tahrîr ve’l-inhâ bi’l-iltimâs huzûr-ı âlîlerine i‘lâm olundu. Fî 19 min-Z sene 1206.