Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 815 Hüküm no: 1365 Orijinal metin no: [113b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahak v. Oseb’in kefaletinden dolayı Manuk’tan alacağı olduğu Ma‘rûz Mahmiye-i İslâmbol’da Mercan’da mütemekkin Sahak v. Oseb nâm zimmî medîne-i Üsküdar’da mahfil-i Bâb’da meclis-i şer‘-i hatîrde Manuk v. Vasil muvâcehesinde gāib ani’l-meclis karındaşı Hıristo nâm zimmî târih-i i‘lâmdan dört sene mukaddem yedimden iştirâ eylediği yirmi dört vakıyye basdırma beher kıyyesi ellişer akçeden on bir bin iki yüz akçe ki be-hesâb-ı guruş seksen üç guruş kırk akçenin yirmi beş guruşunu yedinden ahz ü kabz ve altmış sekiz guruş kırk akçe hakkım gāib-i merkūm Hıristo zimmî zimmetinde bâkī kalıp meblağ-ı merkūmun edâsına karındaşı merkūm Manuk zimmî kefîl olmağla kefâletine binâen taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūma ber-vech-i muharrer müdde‘âsını udûldan Asador v. Serkiz ve Batos v. Manik nâm zimmîler şehâdetleriyle vech-i şer‘î üzere muvâcehesinde isbât etmeğin mûcibiyle meblağ-ı merkūm altmış sekiz guruş kırk akçeyi müdde‘î-i merkūm Sahak zimmîye bi-hükmi’l-kefâle edâsıyla merkūm Manuk zimmîye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 9 min-Z sene 1206.