Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 816 Hüküm no: 1366 Orijinal metin no: [113b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Basmacılar Hanı’ndaki basmacı ustaları tarafından nizamlarına aykırı hareket ettiği iddia olunan Basmacı Kirkor’un handan çıkarılmasının istendiği Ma‘rûz Medîne-i Üsküdar’da Ayazma mahallesinde vâki‘ Basmacılar Hanı’nda basmacı ustalarından el-Hâc Ahmed Ağa b. Mustafa ve diğer Ahmed Ağa b. Süleyman ve Abdurrahman Ağa b. Abdülkerîm ve İbrahim Ağa b. Mehmed nâm kimesneler ile zimmî ustalarından Kigork v. Agop ve Karabet v. Kigork ve Ağya v. Serkiz ve Zakar v. Makar nâm zimmîler medîne-i mezbûrede mahfil-i Bâb’da meclis-i şer‘-i hatîrde Basmacı Kirkor v. Avak nâm zimmî muvâcehesinde merkūm Kirkor zimmî şerîr ve müfsid ve mürtekib makūlesinden olup ihtilâl-i nizâmımıza bâdî harekât-ı nâ-marzıyemizde bulunup hattâ muhtellü’d-dimâğ olan hâzır bi’l-meclis Basmacı Artin zimmîden târih-i i‘lâmdan on iki sene mukaddem sana kalıp-kazanlık san‘atını ta‘lîm etmişdim deyü bi-gayrı hakkın elli guruş mütâlebesiyle rencîde kaydında olmağla merkūm Kirkor zimmînin hilâf-ı nizâm harekât-ı şenî‘asından emniyetimiz meslûb olmuşdur deyü herbiri muvâcehesinde teşekkî ve hân-ı mezkûrdan ihrâc olunmak bâbında emr-i âlîleri sudûrunu istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 25 min-Z sene 1206.