Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 816 Hüküm no: 1367 Orijinal metin no: [113b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Hüseyin’in Gülnuş Hatun Vakfı mütevellisi Zaim İbrahim Ağa aleyhine açtığı davada haklı olduğu Ma‘rûz Medîne-i Üsküdar’da Davudpaşa mahallesinde sâkin İbrahim b. Hüseyin nâm kimesne tarafından ber-vech-i âtî vekîl olduğu el-Hâc Osman b. Mehmed ve Ömer b. İbrahim nâm kimesneler şehâdetleriyle sâbit olan el-Hâc İbrahim Ağa b. Mehmed nâm kimesne medîne-i mezbûrede mahfil-i Bâb’da meclis-i şer‘-i hatîrde medîne-i mezbûrede vâki‘ Gülnuş Hatun Vakfı’nın mütevellisi Za‘îm İbrahim Ağa b. Abdullah mahzarında vakf-ı mezbûr musakkafâtından medîne-i mezbûrede Hayreddin mahallesinde vâki‘ bir kıt‘a şükûfe bağçesi bundan akdem vefât eden müvekkilim mezbûrun vâlidesi Kezban bt. Şaban nâm hatunun hayatında bi’l-icâreteyn tasarrufunda olup ba‘de vefâtihî müvekkilim mezbûr ile karındaşları İsmail ve Mehmed’e eslâsen intikāl edip mütevellî-i mezbûr siz müteveffâ-yı mezbûrun evlâdı değilsiniz bağçe-i mezkûru taraf-ı vakıfdan âhara îcâr ederim deyü ihâfe ve müvekkilim mezbûrdan fuzûlî yirmi guruş ahz etmekle bi’l-vekâle istirdâd ederim deyü ba‘de’d-da‘vâ ve’l-istintâk ve’l-ikrâr mûcibiyle meblağ-ı merkūm yirmi guruşun edâsıyla mezbûr İbrahim Ağa şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 7 min-Za sene 1206.