Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 817 Hüküm no: 1369 Orijinal metin no: [114a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski Mehmed Ağa’nın Bulgurlu mahallesindeki mektep ve kuyu vakfının mütevellisinin Seyyid Süleyman Efendi’ye verildiği Ma‘rûz Medîne-i Üsküdar’da Solaksinan mahallesi ahâlisinden ashâb-ı arzuhâl eş-Şeyh Mehmed Salih Efendi b. Ahmed ve es-Seyyid Halil Efendi b. es-Seyyid Mehmed ve Mustafa Beşe b. Ali ve Hüseyin Ağa b. Ali ve Hasan Efendi b. Osman ve Ali Beşe b. Abdullah ve Ahmed Odabaşı b. Ali ve el-Hâc İbrahim b. İbrahim ve Osman b. Mustafa ve es-Seyyid Abdi Efendi b. Yusuf ve Ali Efendi b. Mehmed Salih ve Helvacı Mustafa Beşe b. Receb ve Mu‘allim-i mekteb es-Seyyid Mustafa Sabri Efendi b. Abdullah nâm kimesneler medîne-i mezbûrede mahfil-i Bâb’da meclis-i şer‘-i hatîr-i lâzımü’t-tevkīrde işbu mu‘âyene olunan bin yetmiş bir senesi târihiyle müverraha yevmî iki akçe vazîfe ile tevcîh-i tevliyeti re’y-i hâkime meşrûta bir kıt‘a sûret-i vakfiye mantûkunca Dârü’s-sa‘âdeti’ş-şerîfe ağası nezâret-i aliyyelerinde âsûde evkāfdan merhûm Eski Mehmed Ağa’nın medîne-i mezbûrede Bulgurlu mahallesinde vâki‘ binâ ve ihyâ eylediği mekteb-i münîf ve bi’r-i mâ vakfının mütevellisi es-Seyyid Süleyman Efendi b. es-Seyyid Hüseyin hâzır olduğu hâlde herbiri ifâde-i merâm edip vâkıf-ı mezbûrun sâlifü’z-zikr Solaksinan mahallesinde Gümüşarayıcı sokağında vâki‘ on bir bâb müte’ehhilîn odalarının kârîz lağımları yine vakf-ı mezbûrun kebîr lağımına mülhak ve kimesneye zararı yoğiken lağım-ı mezkûr sel-i kebîrde memlû olduğundan mâ‘adâ sâir ashâb-ı menâzil menzillerinin muhdes lağımlarından hâsıl olan çirkâblarını bi-gayrı hakkın vakf-ı mezbûr lağımına ilhâk ve lağım-ı kebîr adem-i tahammülünden nâşi çirkâbı mahallemize münteşir ve râyiha-i kerîhesinden cümlemiz müte’ezzî ve ufûnetinden emrâz-ı muhtelife hâsıl ve tezâyüd ve iştidâdıyla meşâkk-ı azîmeye giriftâr ve tevliyet-i mezkûre te’bîd olmadığından beher sene Muharrem’inde âhara verilegelmekle îrâd-ı vakf mesârifine vefâ etmeyip mütevellî-i sâbıkların müsâmaha ve müsâhelelerinden lağım-ı mezkûr harâb ve umûr-ı vakf muhtel olmağın tevliyeti bir kimesneye te’bîd olunduğu haysiyetle hayr-ı mahz ve emr-i savâb idiğinü ihbâr ve mütevellî-i mezbûr dahi tevliyet-i merkūme kendiye te’bîden ibkā olunursa ber-vech-i muharrer ta‘mîrine ta‘ahhüd etmekle tevliyet-i mezkûre vazîfe-i mersûmesiyle mezbûr es-Seyyid Süleyman Efendi’ye te’bîden tevcîh ve mahâlline kayd olunmak bâbında emr-i âlîleri sudûrunu ahâli-i mezbûrûndan herbiri istid‘â ve istirhâm-ı inâyet ricâ eyledikleri bi’l-iltimâs huzûr-ı âlîlerine i‘lâm olundu. Fî 26 min-Z sene 1206.