Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 820 Hüküm no: 1375 Orijinal metin no: [114b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise bt. Mehmed ile Emine ve kızı Hadice’nin birbirleri aleyhlerinde açtıkları küfür davalarından bedelsiz olarak vazgeçtikleri Ma‘rûz Medîne-i Üsküdar’da Arakıyeci el-Hâc Mehmed mahallesinde sâkine Nefîse bt. Mehmed nâm hatunun zevci ve tarafından ber-vech-i âtî vekîl olduğu zât-ı mezbûreyi bi’l-mu‘arrefeti’ş-şer‘iye ârifân İmâm Zeynelabidin Efendi b. Mehmed nâm kimesne ile Fatıma bt. Ahmed ve Kezban bt. Mustafa nâm hatunlar şehâdetleriyle sâbit olan es-Seyyid Mehmed b. Hasan nâm kimesne mahfil-i Bâb’da meclis-i şer‘-i hatîrde kezâlik zâtları mu‘arrefe Emine bt. Mustafa ve kızı Hadice bt. Ahmed nâm hatunlar mahzarlarında mezbûretân Emine ve Hadice târih-i i‘lâmdan üç gün mukaddem mahalle-i mezbûrede zevcem müvekkile-i mezbûreyi bi-gayrı hakkın sokakda elleriyle darb ve elfâz-ı kabîha ile şetm ve ırzını hetk etmeleriyle mûcibini bi’l-vekâle taleb ederim deyü da‘vâ ve mezbûretân Emine ve Hadice dahi müdde‘iye-i mezbûre bize elfâz-ı kabîha ile şetm ve ırzımızı hetk eyledi deyü da‘vâ ve herbiri eyledikleri da‘vâlarından bâ-tavassut-ı muslihîn meccânen fâriğalar olup husûs-ı mezkûra müte‘allika âmme-i de‘âvîden herbiri âharın zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 27 min-Z sene 1206.