Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 821 Hüküm no: 1376 Orijinal metin no: [114b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arabacı Seyyid Mahmud’un kendisini dövüp namusuna dil uzattığını şahitlerle ispat ettiği Yağcı Mavranos’la sulh olduğu Ma‘rûz Medîne-i Üsküdar’da Büyük İskele’de arabacı tâifesinden es-Seyyid Mahmud b. Süleyman mahfil-i Bâb’da meclis-i şer‘-i hatîrde medîne-i mezbûrede Dereağzı kurbünde Yağcı Mavranos v. İstati zimmî muvâcehesinde merkūm Mavranos zimmî târih-i i‘lâmdan bir gün mukaddem vakt-i ışâda yağhânesine küspe iştirâ etmek için vardığımda kendi ve gāib ani’l-meclis refiki Kostanti bi-gayrı hakkın beni elleriyle darb ve ırzımı hetk etmeleriyle mûcibini taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını udûlden es-Seyyid Hüseyin b. Hüseyin ve Mehmed Beşe b. Halil nâm kimesneler şehâdetleriyle vech-i şer‘î üzere muvâcehesinde isbât etmeğin mûcibiyle merkūm Mavranos zimmîye şer‘an ta‘zîr olunmak esnâsında beynlerine muslihûn tavassut edip müdde‘î-i mezbûr tasaddî eylediği hakk-ı ta‘zîrinden elli guruş bedel-i makbûz mukābilesinde merkūm Mavranos zimmî ile sulh olup hakk-ı ta‘zîrine ve bi’l-cümle husûs-ı mezkûra müte‘allika âmme-i de‘âvîden merkūm Mavranos zimmînin ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 28 min-Z sene 1206.