Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 823 Hüküm no: 1381 Orijinal metin no: [115a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yasef’in kendisini bıçak ile yaraladığı iddiasıyla Serkiz aleyhine açtığı davada iddiasını ispat edemediği Ma‘rûz Medîne-i Üsküdar’da Selami mahallesi mütemekkinlerinden olup ber-vech-i âtî başı ve sol eli üzerinden ustura yarası ile mecrûh idiği lede’l-keşf ve’l-mu‘âyene zâhir olan Yasef v. Vartan nâm zimmî tarafından vekîl olduğu Hasan b. Ahmed nâm kimesne ile Nişan v. Polat nâm zimmî şehâdetleriyle sâbit olan müvekkil-i merkūmun li-ebeveyn er karındaşı Serope nâm zimmî bi’l-vekâle medîne-i mezbûrede mahfil-i Bâb’da meclis-i şer‘-i hatîrde Serkiz v. Kolos nâm zimmî muvâcehesinde merkūm Serkiz zimmî târih-i i‘lâmdan üç gün mukaddem vakt-i ışâda mahalle-i mezbûrede sandalcı odalarında bi-gayrı hakkın ustura ile müvekkil-i merkūmun sol eli üzerinden darb ve cerh ve başı üzerinden kezâlik darb ve cerh ve hâşimeten şecc etmekle mûcib-i şer‘îsini bi’l-vekâle taleb ederim deyü ba‘de’d-da‘vâ ve’l-istintâk ve’l-inkâr müdde‘î-i vekîl-i merkūm ber-vech-i muharrer müdde‘âsını isbâta kādir olamayıp talebiyle merkūm Serkiz zimmî gıbbe’t-tahlîfi’ş-şer‘î mûcibiyle müdde‘î-i vekîl-i merkūm husûs-ı mezkûrda müvekkiline izâfetle merkūm Serkiz zimmîye bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî-gurreti M sene 1207.