Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 824 Hüküm no: 1383 Orijinal metin no: [115a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Hasan’ın mehir ve nafaka bedeli olarak boşadığı karısı Emine’ye borcu olduğu Ma‘rûz Medîne-i Üsküdar’da Pazarbaşı mahallesinde sâkine sâhibe-i arzuhâl mu‘arrefetü’z-zât Emine bt. Ahmed nâm hatun mahfil-i Bâb’da meclis-i şer‘-i hatîrde derûn-ı arzuhâlde ismi mezkûr zevc-i mutallıkı Osman b. Hasan mahzarında mezbûr Osman zevc-i dâhilim olup târih-i i‘lâmdan yirmi gün mukaddem beni tatlîk etmekle zimmetinde mütekarrir ve ma‘kūdun-aleyh olan yirmi beş guruş mehrim ile bakıye nafaka-i iddet-i ma‘lûme ve meûnet-i süknâm için bi’t-terâzî beş guruş ki cem‘an otuz beş ile sekiz sene mukaddem bir def‘a dahi tatlîk edip kezâlik zimmetinde mütekarrir ve ma‘kūdun-aleyh olan otuz guruş ki cem‘an altmış guruş hakkımı taleb ederim deyü da‘vâ mezbûr Osman cevâbında müdde‘iye-i mezbûre ber-vech-i muharrer eylediği def‘e akidde elli beş guruş mehir ile zevcesi olup târih-i mezkûra tatlîki ikrâr lâkin mukaddemâ mehr-i müecceli olan otuz guruşu bana hibe ve benim zimmetimi ibrâ etmişdi deyü eylediği def‘ini beyâna ve ityâna kādir olamayıp talebiyle müdde‘iye-i mezbûre Emine gıbbe’t-tahlîfi’ş-şer‘î mûcibiyle meblağ-ı merkūm altmış guruşun edâsıyla mezbûr Osman şer‘an ilzâm olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 29 min-Z sene 1206.