Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 825 Hüküm no: 1384 Orijinal metin no: [115a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bağcı Yusuf’un bağ yoluna müdahale ettiği iddiasıyla komşusu Kuyumcu Maroke aleyhine açtığı davada sulh oldukları Ma‘rûz Bi’l-iltimâs kıbel-i şer‘den meb‘ûs Mehmed Esad Efendi dâ‘îleri medîne-i Üsküdar’da Yenimahalle kurbünde Akyapu nâm mahâlde kâin Bağcı Yusuf b. Abdullah’ın sâkin olduğu menzile varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde mezbûr Yusuf meclis-i ma‘kūd-ı mezkûrda câr-ı mülâsıkı Kuyumcu Maroke v. Avadik nâm zimmî muvâcehesinde işbu üzerinde akd-i meclis-i şer‘ olunan menzilin bağ kapısından nihâyetinde vâki‘ bağımın tarîki olmak üzere bağımda nâbit serviye varınca tahmînen iki yüz elli zirâ‘ tarîkime tecâvüz ve ol-vechile bi-gayrı hakkın müdâhale etmeğin müdâhalesi men‘ ü def‘ olunmak matlûbumdur deyü da‘vâ ve merkūm Maroke zimmî müdâhalesini inkâr etmekle beynlerinde münâza‘ât-ı kesîre vukū‘uyla bâ-tavassut-ı muslihîn müdde‘î-i mezbûr Yusuf’un menzilinin bağ kapısından zikr olunan bağında nâbit serviye varınca alâmât-ı fâsıla vaz‘ıyla ba‘de’l-ifrâz ve’t-ta‘yîn ve’l-kabûl herbiri âharın ifrâz olunan mahâlline müte‘allika âmme-i de‘âvîden ba‘de’l-ibrâ ve’l-kabûl kat‘-ı münâza‘a eylediklerini mezbûr dâ‘îleri mahâllinde tahrîr ve inhâ eylediği huzûr-ı âlîlerine i‘lâm olundu. Fî 2 min-M sene 1207.