Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 825 Hüküm no: 1385 Orijinal metin no: [115a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İvaz Fakih adlı vâkıfın evladından Kolancı Ali Beşe’nin vakıf adına aldığı yüz kuruşun elli kuruşunu vâkıfın diğer evladından Bostancı Mustafa’ya vermesi gerektiği Ma‘rûz Medîne-i Üsküdar’da Vâlide-i Atik mahallesinde sâkin Bostanî Mustafa b. Hayrullah nâm kimesne medîne-i mezbûrede mahfil-i Bâb’da meclis-i şer‘-i hatîrde Kolancı Ali Beşe b. Abdullah nâm kimesne mahzarında işbu yedimde olan bir kıt‘a emr-i âlî-şân ve i‘lâm-ı şer‘î mûcebince medîne-i mezbûrede vâki‘ merhûm İvaz Fakih nâm vâkıfın vakf-ı mezkûrunun gallâtını evlâd ve evlâd-ı evlâdına ale’s-seviye şart ve ta‘yîn eylediği evlâddan ben Mustafa Dede silsilesinden ekber-i evlâd olup ve mezbûr Ali dahi cedd-i a‘lâmız vâkıf-ı mezbûrun kezâlik evlâddan Kelâmî silsilesinden hâlâ mütevellî ve silsile-i mezbûrenin ekberi olan Hadice Hatun’un vekîl-i müseccel-i şer‘îsi olup gallâtı vekâleten ahz ü kabz ve tarafeyne bi’l-münâsafe teslîm edegelmiş iken mezbûr Ali târih-i i‘lâmdan bir ay mukaddem gāib ani’l-meclis Maroke nâm zimmîden vakf-ı mezkûra müte‘allika vekâleten da‘vâya tasaddî ve vakf-ı merkūm için yüz guruş ahz ü kabz ve hâlâ mütevellî-i mezbûreye ve bana teslîm etmeyip yedinde kalmağla meblağ-ı merkūmun nısfı olan elli guruşu ber-vech-i muharrer Mustafa Dede silsilesinden benim ile sâir evlâdları için suâl olunup teslîme tenbîh olunmak matlûbumdur deyü ba‘de’d-da‘vâ ve’l-istintâk ve’l-ikrâr mûcibiyle meblağ-ı merkūm elli guruşun müdde‘î-i mezbûra edâsıyla mezbûr Ali şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 29 min-Z sene 1206.