Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 826 Hüküm no: 1386 Orijinal metin no: [115b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Denizde boğularak vefat eden Mehmed b. İsmail’in vârislerinin talebi üzerine cesedinin yerinde muayene olunduğu Ma‘rûz Bi’l-iltimâs kıbel-i şer‘-i şerîfden meb‘ûs Kâtib es-Seyyid Abdurrahman Efendi dâ‘îleri ümenâ-i şer‘le medîne-i Üsküdar’da Büyük İskele’de Çöplük nâm mahalle varıp mazbûtü’l-esâmî Müslimîn huzûrlarında ba‘de akdi’l-meclis medîne-i Üsküdar’da Selmanağa mahallesi ahâlisinden olup târih-i i‘lâm günü li-ecli’l-gasl deryaya duhûl ve garîkan vefât eden Mehmed b. İsmail nâm sagīrin ceddesi mu‘arrefetü’z-zât Kezban bt. Mehmed ile li-üm er karındaşı İsmail b. Hüseyin meclis-i ma‘kūd-ı mezkûrda herbiri bast-ı kelâm ve ifâde-i merâm edip müteveffâ-yı sagīr-i mezbûr Mehmed târih-i mezkûrda kendi sun‘uyla deryaya duhûl ve garîkan vefât etmekle kıbel-i şer‘den keşf ve mu‘âyene olunmak matlûbumdur dediklerinde fi’l-hakīka müteveffâ-yı sagīr-i mezbûr Mehmed’in a‘zâsına nazar olundukda eser-i cerh ve hank misillü nesne olmayıp ancak kendi sun‘uyla garîkan vefât eylediğini ba‘de’l-keşf ve’l-mu‘âyene vâki‘ hâli mezbûr dâ‘îleri mahâllinde ba‘de’t-tahrîr ve’l-inhâ huzûr-ı âlîlerine i‘lâm olundu. Fî 25 min-Z sene 1206.