Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 826 Hüküm no: 1387 Orijinal metin no: [115b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahveci Hacı Ali Ağa’nın havaleden Enfiyeci Yaşova’dan alacağı olduğu Ma‘rûz Medîne-i Üsküdar’da Davudpaşa mahallesinde sâkin Kahveci el-Hâc Ali Ağa b. Mustafa mahfil-i Bâb’da meclis-i şer‘-i hatîrde Enfiyeci Yaşova v. İsak Yahûdî muvâcehesinde merkūm Yaşova Yahûdî’nin bundan akdem gāib ani’l-meclis Enfiye Emîni Numan Efendi’ye deyn-i şer‘îden yüz yirmi beş guruş deyni olup benim dahi mezbûr Numan Efendi zimmetinde kezâlik yüz yirmi beş guruş hakkım olmağla mezbûr Numan Efendi beni deyn-i mezkûr ile târih-i i‘lâmdan dört ay yedi gün mukaddem merkūm Yaşova Yahûdî üzerine havâle-i mukayyede ile havâle ve herbirimiz kabûl eyledikden sonra meblağ-ı merkūm yüz yirmi beş guruşun seksen guruşunu merkūm Yaşova yedinden ahz ü istifa ve kırk beş guruşu zimmetinde bâkī kalmağla taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını beyâna kādir olamayıp talebiyle merkūm Yaşova Yahûdî’ye yemîn teklif olundukda merkūm Yaşova Yahûdî yemînden nükûl etmeğin mûcibiyle meblağ-ı bâkī-i merkūm kırk beş guruşu müdde‘î-i mezbûra teslîme merkūm Yaşova Yahûdî’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 22 min-Za sene 1206.