Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 830 Hüküm no: 1396 Orijinal metin no: [116a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazar v. Arım’ın havaleden alacağı olduğu Ma‘rûz Medîne-i Üsküdar’da kebâbcılar fırınında mütemekkin Etmekci Kazar v. Arım zimmî medîne-i mezbûrede mahfil-i Bâb’da meclis-i şer‘-i hatîrde şahsı mu‘arrefe Antran bt. Bogos nâm Nasrâniye muvâcehesinde merkūm Antran Nasrâniye târih-i i‘lâmdan beş sene mukaddem gāib ani’l-meclis Vartan nâm zimmî yedinden iştirâ ve kabz eylediği nân-ı azîz semeninden müctemi‘a ba‘de külli’l-hesâb kırk beş guruş gāib-i merkūma deyni olup üçümüz bir meclisde olduğumuz hâlde gāib-i merkūm meblağ-ı merkūm kırk beş guruş ile merkūme Antran Nasrâniyeyi havâle-i mutlaka ile benim üzerime havâle ve herbirimiz havâle-i mezkûreyi kabûl ve hâlâ zimmetinde olmağla taleb ederim deyü da‘vâ ve merkūme Antran Nasrâniye ber-vech-i muharrer havâleyi ve ol-mikdâr deyni olduğunu ikrâr lâkin târih-i i‘lâmdan iki sene mukaddem merkūm Kazar zimmîye deyn-i mezkûru bi’d-defa‘ât tamamen edâ ve teslîm edip zimmetim berî’e olmuşdur deyü eylediği def‘ini isbâta kādire olamayıp talebiyle merkūm Kazar zimmî gıbbe’t-tahlîfi’ş-şer‘î mûcibiyle meblağ-ı merkūm kırk beş guruşu müdde‘î-i merkūma edâya bi-hükmi’l-havâle merkūme Antran Nasrâniyeye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 6 M sene 1207.