Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 831 Hüküm no: 1399 Orijinal metin no: [116a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ali b. Musa’nın at bedelinden alacağı olduğu Ma‘rûz Medîne-i Üsküdar’da Hasanağa mahallesinde sâkin el-Hâc Ali b. Musa mahfil-i Bâb’da meclis-i şer‘-i hatîrde Bostanî Halil b. Musa mahzarında mezbûr Halil târih-i i‘lâmdan üç sene mukaddem yedimden iştirâ ve kabz eylediği bir re’s yağız bârgir semeninden kırk beş guruş hakkımın on sekiz buçuk guruşunu yedinden ahz ü istifâ ve yirmi altı buçuk guruşu zimmetinde bâkī kalmağla taleb ederim deyü da‘vâ mezbûr Bostanî Halil cevâbında bârgir-i mezkûru müdde‘î-i mezbûrdan ancak kırk guruşa iştirâsını ikrâr ziyâde beş guruşu inkâr etmeğin müdde‘î-i mezbûr ber-vech-i muharrer ziyâde müdde‘âsını beyâna kādir olamayıp talebiyle mezbûr Bostanî Halil’e yemîn teklif olundukda mezbûr Bostanî Halil yemînden nükûl etmeğin mûcibiyle meblağ-ı bâkī-i merkūm yirmi altı buçuk guruşu müdde‘î-i mezbûra edâ ve teslîme mezbûr Bostanî Halil’e tenbîh olunduğu bi’l-iltimâs huzûr-ı âlîlerine i‘lâm olundu. Fî 6 min-M sene 1207.