Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 832 Hüküm no: 1401 Orijinal metin no: [116b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Mehmed Ağa’nın kardeşinden alacağı olduğu Ma‘rûz Medîne-i Üsküdar’da Büyük İskele’de Duhânî Mehmed Ağa b. Hüseyin nâm kimesne medîne-i mezbûrede mahfil-i Bâb’da meclis-i şer‘-i hatîrde li-ebeveyn karındaşı Hasan Beşe mahzarında mezbûr Hasan Beşe târih-i i‘lâmdan sekiz ay mukaddem bi’d-defa‘ât yedimden bi-tarîki’l-karz istidâne ve kabz eylediği yüz yetmiş guruş hakkımın yetmiş altı guruşunu yedinden ahz ve doksan dört guruşu zimmetinde hakkım bâkī kalmağla taleb ederim deyü da‘vâ ol dahi cevâbında müdde‘î-i mezbûra ancak seksen dört guruş deyni olduğunu ikrâr ziyâde on guruşu inkârından mâ‘adâ meblağ-ı bâkī-i merkūm seksen dört guruşu dahi müdde‘î-i mezbûra tamamen edâ ve teslîm edip ol-vechile zimmetim berî’e olmuşdu deyü ba‘de’d-def‘ ve’l-inkâr mezbûrân Mehmed Ağa ve Hasan Beşe’den herbiri def‘ ve ziyâde müdde‘âlarını isbâtdan izhâr-ı acz etmeleriyle bi’t-taleb mezbûrân Mehmed Ağa ve Hasan Beşe’den herbiri tahlîf olundukdan sonra mûcibiyle mezbûr Mehmed Ağa ziyâde on guruş mütâlebesiyle bilâ-beyyine mu‘ârazadan ba‘de’l-men‘ meblağ-ı bâkī-i merkūm seksen dört guruşu müdde‘î-i mezbûra edâ ve teslîme mezbûr Hasan Beşe’ye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 10 min-M sene 1207.