Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 833 Hüküm no: 1403 Orijinal metin no: [116b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimyat v. Kostanti’nin alacağı olduğu iddiasıyla Şerbetci Asvador v. açtığı davasının başka şahitlerin dinlenmesi için ertelendiği Ma‘rûz Mahmiye-i İslâmbol’da Cebeali Kapısı hâricinde mütemekkin derûn-ı arzuhâlde mezkûrü’l-ism Dimyat v. Kostanti nâm zimmî ve yine Üsküdar’da mahfil-i Bâb’da meclis-i şer‘-i hatîrde medîne-i mezbûrede Yenimahalle mütemekkinlerinden arzuhâl eden Şerbetci Asvador v. Agop ve Praşkova v. Kostanti nâm zimmîler muvâcehelerinde merkūmân Asvador ve Praşkova ve gāib ani’l-meclis Tanaş zimmîler târih-i i‘lâmdan yirmi sekiz ay mukaddem mahalle-i mezbûrede kendi dükkânımda yedimden iktirâz ve kabz ve umûruna sarfla istihlâk eyledikleri yüz seksen altı guruş hakkımın edâsına herbiri âhara kefîl ve zâmin olmalarıyla meblağ-ı merkūm yüz seksen altı guruşu kefâletlerine binâen taleb ederim deyü da‘vâ ve merkūmân inkâr etmeleriyle müdde‘î-i merkūm ber-vech-i muharrer eylediği da‘vâsına ikāmet eylediği iki nefer şâhid edâ-yı şehâdet edemeyip şâhid-i âhar ikāmetine havâle olunup henüz da‘vâlarına faysal verilmediği cerîdede mastûr ve mukayyeddir bâkī fermân hazret-i veliyyü’l-emrindir. Fî 9 min-M sene 1207.