Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 834 Hüküm no: 1406 Orijinal metin no: [116b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kara sevdaya tutulup intihar eden Arzu bt. İbrahim’in cesedinin tahkiki Ma‘rûz Vârid olan fermân-ı âlîlerine imtisâlen kıbel-i şer‘-i şerîfden mürsel Kâtib Mehmed Emin Efendi dâ‘îleri medîne-i Üsküdar’da Debbâğlar mahallesinde sâkin İbrahim b. Mustafa’nın menziline varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde mezbûr İbrahim’in zevcesi Arzu bt. İbrahim nâm hatun birkaç aydan beri kendiye kara sevdâ târî olup târih-i i‘lâm günü vakt-i subhda kendiyi menzil-i mezbûrun sofasından kendiyi ip ile salb ol hînde vefât etmekle keşf ve mu‘âyene olunmak matlûbumdur dedikde nisâ tâifesinden İsmihan bt. Mehmed ve Âişe bt. Hasan ve Hanife bt. Mehmed ve Zahide bt. Hüseyin nâm hatunlar mezbûre Arzu’nun a‘zâsına nazar eylediklerinde eser-i cerh olmayıp maslûbeten meyyit bulunduğu ba‘de’l-keşf ve’l-mu‘âyene defnine izin birle vâki‘ hâli mezbûr dâ‘îleri mahâllinde ba‘de’t-tahrîr ve’l-inhâ mübâşiri bostaniyân-ı hâssa ağa tarafından müte‘ayyin çukadâr iltimâsıyla huzûr-ı âlîlerine i‘lâm olundu. Fî 10 min-M sene 1207.