Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 835 Hüküm no: 1408 Orijinal metin no: [117a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimyat v. Kostanti’nin alacağı olduğu iddiasıyla açtığı davada iddiasını ispat edemediği Ma‘rûz Mahmiye-i İslâmbol’da Cebeali Kapısı hâricinde mütemekkin derûn-ı arzuhâlde mezkûrü’l-ism Dimyat v. Kostanti nâm zimmî medîne-i Üsküdar’da mahfil-i Bâb’da meclis-i şer‘-i hatîrde medîne-i mezbûrede Yenimahalle mütemekkinlerinden arzuhâl eden Şerbetçi Asvador v. Agop ve Praşkova v. Kostanti nâm zimmîler muvâcehelerinde merkūmân Asvador ve Praşkova ve gāib ani’l-meclis Tanaş zimmîler târih-i i‘lâmdan yirmi sekiz ay mukaddem mahalle-i mezbûrede şerbetçi iken kendi dükkânımda yedimden iktirâz ve kabz eyledikleri yüz seksen altı guruş hakkımın edâsına herbiri âhara kefîl ve zâmin olmalarıyla meblağ-ı merkūm yüz seksen altı guruşu kefâletlerine binâen taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm ber-vech-i muharrer eylediği da‘vâsına ikāmet eylediği iki nefer şâhid edâ-yı şehâdet edemeyip şâhid-i âhar ikāmetine havâle olundukda mehl-i şer‘î tamam ve altı gün mürûr edip tahlîfe dahi tâlib olmadığından mâ‘adâ müdde‘î-i merkūm müzevvir makūlesinden olup hattâ müdde‘âsı’çün iki nefer zimmîlere size onar guruş vereyim benim müdde‘âma şehâdet edin deyü va‘ad edip iddi‘âsında tezvîr ve kâzib olduğunu işbu hâzırûn bi’l-meclis Serkiz v. Manas ve Kirkor v. Kigork ve Kigork v. Manuk ve Lefter v. Oseb ve Artin v. Agop ve Abraham v. Tatos ve Avadik v. Kigork ve Mikâil v. Bogos nâm zimmîler muvâcehesinde ihbâr ve müdde‘î-i merkūm husûs-ı mezkûrda merkūmân Asvador ve Praşkova zimmîlere bilâ-beyyine-i âdile mu‘ârazadan men‘ olunduğu mübâşiri Ali Çavuş iltimâsıyla huzûr-ı âlîlerine i‘lâm olundu. Fî 11 min-M sene 1207.