Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 836 Hüküm no: 1409 Orijinal metin no: [117a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Denizde boğulan Kayıkçı Halil’in vârislerin talebi üzerine cesedinin tahkiki Ma‘rûz Vârid olan fermân-ı âlîlerine imtisâlen kıbel-i şer‘-i şerîfden meb‘ûs Ali Efendi dâ‘îleri ve izzetli bostancıbaşı ağa tarafından müte‘ayyin Çukadâr el-Hâc Abdurrahman ve Çenger karyesi ustası ve sâir mazbûtü’l-esâmî Müslimîn ile medîne-i Üsküdar’a tâbi‘ mârrü’z-zikr Çenger karyesinde Dereağzı nâm mahâlde deryâ kenârında garîkan fevt olan Kayıkcı Halil b. Yusuf nâm meyyitin üzerine varıp garîk-i mezbûrun li-ebeveyn karındaşı Hafız Mehmed Efendi karındaşım mezbûr Halil târih-i i‘lâm günü ba‘de’z-zuhr mahâll-i merkūmda kimesnenin sun‘u olmaksızın gasl için deryaya girip bi-kazâillâhi te‘âlâ garîkan vefât etmekle kimesne ile da‘vâ ve nizâ‘ım olmayıp kıbel-i şer‘den keşfolunmak matlûbumdur dedikde garîk-i mezbûrun a‘zâsına nazar olundukda eser-i cerh ve hank misillü nesnesi olmayıp ancak garîkan vefât eylediği ba‘de’l-keşf ve’l-mu‘âyene defnine izin birle vâki‘ hâli mezbûr dâ‘îleri mahâllinde ba‘de’t-tahrîr ve’l-inhâ mübâşiri çukadâr kulları iltimâsıyla huzûr-ı âlîlerine i‘lâm olundu. Fî 16 min-M sene [1]207.