Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 836 Hüküm no: 1410 Orijinal metin no: [117a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Hacı Ali’nin haksız yere bazı eşyalarını zabtettiği iddiasıyla Fatma bt. Hacı Ali aleyhine açtığı davada iddiasını ispat edemediği Ma‘rûz Mevâdd-ı şer‘iye istimâ‘ı’çün bi’l-iltimâs kıbel-i şer‘-i şerîfden meb‘ûs Mehmed Esad Efendi dâ‘îleri medîne-i Üsküdar’a tâbi‘ Kādı karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde karye-i mezbûre sâkinelerinden mu‘arrefetü’z-zât Hadice bt. el-Hâc Ali nâm hatun meclis-i ma‘kūd-ı mezkûrda yine karye-i mezbûrede sâkine Fatıma bt. el-Hâc Ali nâm hatunun zevci ve tarafından ber-vech-i âtî vekîl olduğu zât-ı mezbûreyi bi’l-mu‘arrefeti’ş-şer‘iye ârifân İbrahim Beşe b. İsmail ve Mehmed Beşe b. Yusuf nâm kimesneler şehâdetleriyle sâbit olan Bostanî Veliyüddin Beşe b. İbrahim mahzarında ben müvekkile-i mezbûre Fatıma Hatun ile karye-i mezbûrede ma‘an bir menzilde sâkin iken eşyâ-i memlûkemden on şayak yasdık ve üç minder ve üç çit mak‘ad ve yedi yorgan ma‘a çârşeb ve üç döşek ve bir şilte ve altı baş yasdığı ve bir oda keçesi ve bir Mısır hasırı ve beş tencere ma‘a kapak ve on yedi sahan ma‘a kapak ve sagīr kebîr iki sini ve iki tepsi ve bir kazgan ve bir güğüm ve bir leğen ibrik ve bir âbdest leğenimi fuzûlî ahz ve zabt etmekle teslîme tenbîh olunmak matlûbumdur deyü da‘vâ ve vekîl-i mezbûr cevâbında eşyâ-i muharrere-i mezkûre müdde‘iye-i mezbûre Hadice Hatun’un mülkü iken bin iki yüz beş senesi Rebî‘ülâhir’inin beşinci günü zevcem mezbûre Fatıma Hatun’a bi-safkatin vâhidetin yetmiş guruşa bey‘ ve temlik ve teslîm ve semeni mütâlebesinden zimmetini ibrâ ve ıskāt eyledikde ol dahi ber-vech-i muharrer iştirâ ve temellük ve tesellüm ve kabûl etmişdi deyü takrîr-i meşrûhuna mutâbık bir kıt‘a mübâya‘a hücceti ibrâzıyla ba‘de’d-def‘ ve’l-inkâr vekîl-i mezbûr ber-vech-i muharrer eylediği def‘ini lede’t-tezkiye adâletleri zâhir olan Kasab es-Seyyid Veliyüddin b. es-Seyyid Ahmed ve Berber Molla Mehmed b. Yusuf nâm kimesneler şehâdetleriyle vech-i şer‘î üzere muvâcehesinde isbât etmeğin mûcibiyle müdde‘iye-i mezbûre Hadice husûs-ı merkūmda mezbûre Fatıma Hatun’a bî-vech-i şer‘î mu‘ârazadan men‘ olunduğu mezbûr dâ‘îleri mahâllinde ba‘de’t-tahrîr ve’l-inhâ huzûr-ı âlîlerine i‘lâm olundu. Fî 15 min-M sene [1]207.