Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 837 Hüküm no: 1411 Orijinal metin no: [117a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe ve Tanaş’ın götürü usûlüyle satın aldıkları üzümden zarar ettikleri iddiasıyla açtıkları davada sulh oldukları Ma‘rûz Medîne-i Üsküdar’da Şemsi Paşa bostanında mütemekkine sâhib-i arzuhâl Hasan Beşe b. Ali ve Tanaş v. Kino medîne-i mezbûrede mahfil-i Bâb’da meclis-i şer‘-i hatîrde derûn-ı arzuhâlde ismi mezkûr el-Hâc Mehmed b. Ahmed mahzarında medîne-i mezbûreye muzâfe Kartal nâhiyesi toprağında vâki‘ ma‘lûmü’l-hudûd bağının üzümünü târih-i i‘lâmdan yirmi gün mukaddem ba‘zısı kemâl bulmuş ve ba‘zısı kemâl bulmamış üzümünü kemâl buluncaya değin kürûmunda terk şartıyla bize dört yüz yetmiş guruşa mücâzefeten bey‘ biz dahi ba‘de’l-iştirâ zikr olunan üzümden seksen guruşluk üzüm kat‘ ve âhara bey‘le istihlâk edip lâkin zararımız mütehakkık olmağla bey‘-i mezkûrun fesâdına binâen mahsûl-i mezkûru mezbûr el-Hâc Mehmed’e red ve makbûzu olan meblağ-ı merkūm dört yüz yetmiş guruşun seksen guruşunu ba‘de’l-mahsûb bâkī üç yüz doksan guruşu istirdâd ederiz deyü da‘vâ ol dahi cevâbında ol-mikdâr meblağa bey‘ eylediğini ikrâr lâkin şart-ı mezkûru inkâr etmeğin müdde‘iyân-ı mezbûrân ber-vech-i muharrer müdde‘âlarını beyân esnâsında bâ-tavassut-ı muslihîn otuz guruş bedel-i makbûz mukābilesinde mezbûr el-Hâc Mehmed ile sulh olup husûs-ı mezkûra müte‘allika âmme-i de‘âvîden herbiri âharın zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 17 min-M sene 1207.