Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 838 Hüküm no: 1412 Orijinal metin no: [117b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Hüseyin’in kumanya ve bakır bedelinden alacağı olduğu iddiasıyla açtığı davada sulh olduğu Ma‘rûz Mahrûse-i Galata muzâfâtından kasaba-i Beşiktaş’da sâkin Hasan b. Hüseyin medîne-i Üsküdar’da mahfil-i Bâb’da meclis-i şer‘-i hatîrde Hüseyin b. Osman muvâcehesinde mezbûr Hüseyin ile târih-i i‘lâmdan altı sene mukaddem donanma-yı hümâyûn sefînesinde refîk olup beynimizde münâsafe olmak üzere kumanya ta‘bîr olunur mezbûrun emriyle sefîne-i mezkûrede mekûlâtımız için harc ü sarf eylediğim otuz dört guruşluk zehâirden mezbûrun hissesine isâbet eden on yedi guruş ile yedimden iştirâ ve kabz eylediği vezn ve fiyâtı beynimizde ma‘lûm nühâs semeninden altı guruş ki cem‘an yirmi üç guruş zimmetinde hakkım olmağla taleb ederim deyü müdde‘î-i mezbûr ber-vech-i muharrer tasaddî eylediği da‘vâsından bâ-tavassut-ı muslihîn on altı guruş bedel mukābilesinde sulh olup ziyâde müdde‘âsı olan yedi guruşa müte‘allika âmme-i de‘âvîden mezbûr Hüseyin’in zimmetini ba‘de’l-ibrâ ve’l-kabûl bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu el-emrü li-men lehü’l-emru. Fî 6 min-Muharrem sene 1207.