Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 839 Hüküm no: 1415 Orijinal metin no: [117b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lütfullah Efendi’nin alacağı olduğu Ma‘rûz Medîne-i Üsküdar’a tâbi‘ İstavros karyesinde sâkin sâhib-i arzuhâl Lütfullah Efendi b. İbrahim nâm kimesne medîne-i mezbûrede mahfil-i Bâb’da meclis-i şer‘-i hatîrde derûn-ı arzuhâlde mezkûr el-Hâc Süleyman İzzet b. el-Hâc Veliyüddin nâm kimesne mahzarında bin iki yüz dört senesi Şa‘bân’ının gurresinde yedimden istidâne ve kabz eylediği iki bin guruşa yedimden iştirâ eylediği iki aded Kelâm-ı kadîm ve bir aded Delâil-i şerîf semenlerinden üç yüz guruş ki cem‘an iki bin üç yüz guruş deyni olup hattâ deyn-i meblağ-ı merkūm mukābilesinde alâ tarîki’r-rehn yedime def‘ ve teslîm eylediği karye-i mezbûre toprağında vâki‘ iki kıt‘a bağ ve bir çift altın bilezik ve bir çift altın kuşak ve bir kebîr elmaslı kuşakbaşı ve bir çift göbeği elmaslı altın kuşak ve bir elmaslı zihgir rihân-ı makbûza ve târih-i merkūm ile müverrah yedime i‘tâ eylediği temessüğü fek ile meblağ-ı merkūm iki bin üç yüz guruşu hâlâ taleb ederim deyü da‘vâ ve mezbûr el-Hâc Süleyman cevâbında meblağ-ı merkūmu ikrârını hâvî temessük i‘tâsını ikrâr lâkin ancak müdde‘î-i mezbûr yedinden istidâne ve kabz eylediğim bin sekiz guruş olup ziyâde müdde‘âsı olan beş yüz guruşun üç yüz guruşu bilâ-devr-i şer‘î murâbaha ve bâkī iki yüz guruşu dahi kâziben ikrâr eylediğimden mâ‘adâ makbûzum olan meblağ-ı merkūm bin sekiz yüz guruşun dört yüz yirmi guruşunu müdde‘î-i mezbûr yedine teslîm etmemle ancak bin dört yüz guruş hakkı bâkī kalmışdı deyü def‘a tasaddî eyledikde müdde‘î-i mezbûr Lütfullah Efendi kâziben ikrâr etmişdim deyü ziyâde müdde‘âsı olan iki yüz guruşun yüz guruşunda mezbûr el-Hâc Süleyman ikrârında kâzib olmadığına ve bilâ-devr-i murâbahadır deyü def‘ eylediği üç yüz guruşu beyândan izhâr-ı acz edip ve mezbûr el-Hâc Süleyman dört yüz yirmi guruşunu müdde‘î-i mezbûr yedine def‘ ü teslîm etmişdim deyü eylediği def‘inden müdde‘î-i mezbûr Lütfullah Efendi yüz yirmi guruşu kabzını ikrâr ziyâde üç yüz guruşu inkâr etmeğin müdde‘î-i mezbûr Lütfullah Efendi mezbûr el-Hâc Süleyman’ın ziyâde yüz guruş kabzını ikrârında kâzib olmadığına ve beyândan izhâr-ı acz eylediği def‘ ve müdde‘âsını bi’t-taleb ba‘de’t-tahlîfi’ş-şer‘î mûcibiyle mezbûrân Lütfullah Efendi ve el-Hâc Süleyman ziyâde mütâlebe ve mu‘ârazalarından ba‘de’l-men‘ meblağ-ı bâkī-i merkūm iki bin seksen guruşu müdde‘î-i mezbûr Lütfullah Efendi’ye edâsıyla mezbûr el-Hâc Süleyman’a tenbîh olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 14 min-M sene 1207.