Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 841 Hüküm no: 1418 Orijinal metin no: [118a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah b. Abdullah ile karısı Havva’nın oğulları Halil’i döven Seyyid Mehmed aleyhine açtıkları davada sulh oldukları Ma‘rûz Medîne-i Üsküdar’da Reis mahallesinde sâkin olup ber-vech-i âtî kara bere idiği lede’l-keşf ve’l-mu‘âyene zâhir olan Halil nâm sagīrin babası ve velîsi Abdullah b. Abdullah ile vâlidesi zâtı mu‘arrefe Havva bt. Mehmed nâm hatun medîne-i mezbûrede mahfil-i Bâb’da meclis-i şer‘-i hatîrde es-Seyyid Mehmed b. es-Seyyid Hasan nâm kimesne tarafından ber-vech-i âtî tasdîka vekîl olan eş-Şeyh es-Seyyid Mehmed Şûhî Efendi b. eş-Şeyh Ali mahzarında mezbûr es-Seyyid Mehmed oğlumuz sagīr-i mezbûr Halil’i târih-i i‘lâmdan üç gün mukaddem medîne-i mezbûrede Tabutcular sûkunda bi-gayrı hakkın değnek ile sol böğrüne darb ve kara bere etmekle mûcib-i şer‘îsini bi’l-velâye taleb ederim taleb ve da‘vâya mübâşeret eylediklerinde müdde‘iyân-ı mezbûrân ber-vech-i muharrer tasaddî eyledikleri da‘vâlarından bâ-tavassut-ı muslihîn on beş guruş bedel-i makbûza sulh olup mezbûr es-Seyyid Mehmed afv ve zikr olunan kara bereye ve mâ-yuhdesü-minhe müte‘allika âmme-i de‘âvîden zimmetini ibrâ ve ıskāt eylediklerinde ol dahi ber-vech-i muharrer ibrâlarını kabûl eylediğini vekîl-i mezbûr tasdîk edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 18 min-M sene 1207.