Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 842 Hüküm no: 1420 Orijinal metin no: [118a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata Sarayı ağalarından iken deliren ve Çengelköy’e gönderilen Mehmed Ağa’nın insanları rahatsız etmesi sebebiyle Üsküdar Dârüşşifası’na gönderilmesinin istendiği Ma‘rûz Mevâdd-ı şer‘iye istimâ‘ı’çün bi’l-iltimâs kıbel-i şer‘den meb‘ûs Mehmed Esad Efendi medîne-i Üsküdar’da tâbi‘ Çenger karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde karye-i mezbûre imâmı Süleyman Efendi b. Abdullah ve müderrisinden İbrahim Efendi b. Mehmed ve Kapudan el-Hâc Ahmed Ağa b. Mustafa ve Uzun Ahmed Ağa b. el-Hâc Osman ve Lütfullah Efendi b. Ali ve Mustafa Efendi b. Hamza ve Mehmed Âkif b. Mehmed Tâhir ve Ahmed b. Abdullah ve Hasan Ağa b. el-Hâc İbrahim ve Haseki Hamdullah Ağa ve Haseki Hasan Ağa ve Subaşı es-Seyyid Osman Ağa ve Alemdâr Mustafa Beşe ve Ahmed Ağa meclis-i ma‘kūd-ı mezkûrda karye-i mezbûre ahâlisinden olup Galata Sarayı ağalarından iken bi-kazâillâhi te‘âlâ cünûn târî olmağla saray-ı merkūmdan ihrâc ve karyemize irsâl olunan hâzır bi’l-meclis Mehmed Ağa b. Halil esvâk ve bâzârda leylen ve nehâren geşt ü güzâr ve ricâl ve nisâya taş ile ta‘arruz eylediğinden mâ‘adâ enîs ve enîsesinden kimesnesi olmayıp menzilinde yalnız beytûtet edip ihrâk havfı olmağın adem-i emniyetlerini ifâde ve siyâneten li’l-ibâd medîne-i mezbûre dârüşşifâsına irsâlini istid‘â eylediklerini mezbûr dâ‘îleri mahâllinde ba‘de’t-tahrîr ve’l-inhâ mecnûne mezbûr ifâkat buluncaya dek mahâll-i merkūma irsâl olunduğu bi’l-iltimâs huzûr-ı âlîlerine i‘lâm olundu. Fî 22 min-M sene 1207.