Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 842 Hüküm no: 1421 Orijinal metin no: [118a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kıbtiye Rabia’nın boşandığı kocasından mehir alacağı olduğu Ma‘rûz Mahmiye-i İslâmbol hısnı ebvânından Ayvansaray Kapısı kurbünde el-Hâc İlyas mahallesinde mütemekkine mu‘arrefetü’ş-şahs Rabia bt. Abdullah nâm Kıbtiye medîne-i Üsküdar’da mahfil-i Bâb’da meclis-i şer‘-i hatîrde zevc-i sâbıkı Ahmed b. Ali nâm Kıbtî muvâcehesinde ben mezbûr Ahmed’in otuz guruş mehr-i müeccel tesmiyesiyle zevce-i medhûlü iken târih-i i‘lâmdan üç buçuk ay mukaddem beni tatlîk etmekle mezbûrun zimmetinde mütekarrir ve ma‘kūdün-aleyh olan mârrü’z-zikr otuz guruş mehrimi taleb ederim deyü da‘vâ ol dahi cevâbında müdde‘iye-i merkūma beş guruş mehir ile zevcesi olup ber-vech-i muharrer tatlîkini ikrâr ziyâde yirmi beş guruş mehrini inkâr etmeğin müdde‘iye-i merkūme ber-minvâl-i muharrer ziyâde müdde‘âsını İmâm Hafız Ebûbekir Efendi b. Mehmed ve Mehmed Efendi b. Ali nâm kimesneler şehâdetleriyle ber-nehc-i şer‘î muvâcehesinde isbât etmeğin mûcibiyle meblağ-ı merkūm otuz guruşu müdde‘iye-i merkūmeye edâ ve teslîme mezbûr Ahmed’e şer‘an tenbîh olunduğu ba‘de’t-tescîl bi’l-iltimâs huzûr-ı âlîlerine i‘lâm olundu. Fî 28 min-Z sene 1206.