Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 843 Hüküm no: 1422 Orijinal metin no: [118a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Abdullah’ın emanet olarak verdiği bileziğin bedeli olarak boşandığı kocasından alacağı olduğu Ma‘rûz Medîne-i Üsküdar’da Kefçe mahallesinde sâkine mu‘arrefetü’z-zât Emine bt. Abdullah nâm hatun medîne-i mezbûrede mahfil-i Bâb’da meclis-i şer‘-i hatîrde zevc-i sâbıkı Ömer b. İbrahim mahzarında zevciyet beynimizde kāime iken otuz altı guruş kıymetli bir çift altın bileziğimi mezbûr Ömer yedine bi-tarîki’l-emâne vaz‘ ve teslîm ol dahi ba‘de’t-tesellüm âhara otuz altı guruşa bey‘le istihlâk etmekle kıymeti olan meblağ-ı merkūm otuz altı guruşu mezbûr Ömer’den bi-hükmi’d-damân taleb ederim deyü da‘vâ ol dahi cevâbında zikr olunan bileziği ahzını ve ber-vech-i muharrer âhara bey‘le istihlâkini ikrâr lâkin müdde‘iye-i mezbûre zikr olunan bileziği bana hibe-i sahîha ile hibe ve temlik ve teslîm ben dahi kabz ve kabûl edip ol-vechile mülk-i mevhûbum olmuşdu deyü ba‘de’d-def‘ ve’l-inkâr dâfi‘-i mezbûr ber-vech-i muharrer tasaddî eylediği def‘ini beyândan izhâr-ı acz edip talebiyle müdde‘iye-i mezbûre Emine gıbbe’t-tahlîfi’ş-şer‘î mûcibiyle meblağ-ı merkūm otuz altı guruşu müdde‘iye-i mezbûreye def‘aten edâya iktidârı olmayıp tecîle tâlib olmağın müdde‘iye-i mezbûre dahi târih-i i‘lâmdan beher şehr tamamında üçer guruşdan on iki ay tamamına değin edâ etmek üzere bi’t-taleb mezbûr Ömer’i tecîl ve taksît eylediğinde ol dahi ber-vech-i muharrer müeccelen ve mukāssatan edâya ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 20 min-M sene 1207.