Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 843 Hüküm no: 1423 Orijinal metin no: [118a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiraladığı evde tahtakurusu çıkması üzerine kira sözleşmesini fesheden Yahudi Mosi’nin ödediği kira bedelinin kendisine iadesi Ma‘rûz Medîne-i Üsküdar’da Akyapu nâm mahâlde mütemekkin Mosi v. Abraham nâm Yahûdî medîne-i mezbûrede mahfil-i Bâb’da meclis-i şer‘-i hatîrde Nikola v. Delot nâm zimmî muvâcehesinde merkūm Nikola zimmî mahâll-i mezkûrda vâki‘ bir bâb menzilini iki ay tamamına dek kırk guruş ücret ile bana îcâr ve teslîm ben dahi ba‘de’l-istîcâr menzil-i mezkûrda on beş gün mütemekkin olup lâkin menzil-i mezkûrda tahta kehlesi kesîr olduğundan akd-i icâre fesh birle medfû‘um olan meblağ-ı merkūm kırk guruşun on guruşunu menzil-i mezkûrun on günlük ücretine ba‘de’l-mahsûb ve otuz guruşu merkūm Nikola zimmî zimmetinde bâkī kalmağla istirdâd ederim deyü da‘vâ ol dahi cevâbında menzil-i mezkûru müddet-i ma‘lûme tamamına dek müdde‘î-i merkūma ücret ile îcârını ve meblağ-ı merkūm kırk guruş ahz eylediğini ikrâr lâkin menzil-i mezkûrda tahta kehlesi kesîr olduğunu inkâr etmeğin müdde‘î-i merkūm Mosi Yahûdî ber-vech-i muharrer müdde‘âsını Salamon v. İsak ve Danyel v. İsrail nâm Yahûdîler şehâdetleriyle ber-nehc-i şer‘î muvâcehesinde isbât etmeğin mûcibiyle meblağ-ı bâkī-i merkūm otuz guruşu müdde‘î-i merkūm Mosi Yahûdî’ye edâ ve teslîme merkūm Nikola zimmîye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 13 min-Zilhicce sene 1206.