Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 844 Hüküm no: 1424 Orijinal metin no: [118b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultana bt. İsayi’nin bedeli karşılığında devrettiği vakıf menzilinden alacağı olduğu iddiasını ispat edemediği Ma‘rûz Mahmiye-i İslâmbol hısnı ebvâbından Balat Kapısı kurbünde Kesmekaya mahallesinde mütemekkine ve şahsı mu‘arrefe sâhibe-i arzuhâl Sultana bt. İsayi nâm Nasrâniye medîne-i Üsküdar’da mahfil-i Bâb’da meclis-i şer‘-i hatîrde derûn-ı arzuhâlde mezkûr Kirkor v. Kazar nâm zimmî muvâcehesinde târih-i i‘lâmdan sekiz sene mukaddem Dârü’s-sa‘âdeti’ş-şerîfe ağası vakfı musakkafâtından olup mahmiye-i mezbûrede Fethiye Câmi‘-i Şerîfi kurbünde vâki‘ ma‘lûmü’l-hudûd bir bâb vakıf menzilimi bâ-ma‘rifet-i mütevellî merkūm Kirkor zimmîye üç yüz elli guruş bedel mukābilesinde ferâğ ve tefvîz eylediğimde ol dahi tefevvüz ve kabûl ve bedel-i mezkûr üç yüz elli guruşun iki yüz elli guruşunu yedinden ahz ve yüz guruşu zimmetinde bâkī kalmağla taleb ederim deyü da‘vâ ve merkūm Kirkor zimmî cevâbında menzil-i mezkûru üç yüz elli guruş bedel mukābilesinde bâ-ma‘rifet-i mütevellî tefevvüz eylediğini ikrâr lâkin müdde‘iye-i merkūme menzil-i mezkûru hîn-i ferâğında bedel-i merkūm üç yüz elli guruşu def‘aten yedimden ahz ü kabz edip ol-vechile zimmetim berî’e olmuşdu deyü ba‘de’d-def‘ ve’l-inkâr dâfi‘-i mezkûr Kirkor zimmî ber-vech-i muharrer eylediği def‘ini lede’t-tezkiye adâletleri zâhir olan Mustafa Beşe b. Mehmed nâm kimesne ile Koğas v. Bogos nâm zimmînin şehâdetleriyle ber-nehc-i şer‘î muvâcehesinde isbât etmeğin mûcibiyle müdde‘iye-i merkūme Sultana Nasrâniye da‘vâ-yı mezkûresiyle merkūm Kirkor zimmîye bî-vech-i şer‘î mu‘ârazadan men‘ olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 14 min-Za sene 1206.