Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 845 Hüküm no: 1425 Orijinal metin no: [118b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocasından boşanan Hafize’nin yanında bulunan oğlu Seyyid Ali’nin velayetinin babasına verildiği Ma‘rûz Medîne-i Üsküdar’da Debbâğlar mahallesinde sâkin es-Seyyid Ali b. es-Seyyid Ali medîne-i mezbûrede mahfil-i Bâb’da meclis-i şer‘-i hatîrde zevce-i sâbıkāsı mu‘arrefetü’z-zât Hafîze bt. İsmail nâm hatun mahzarında benim firâşımdan hâsıl ve mezbûre Hafîze’den mütevellid takrîben beş yaşında olan işbu hâzır bi’l-meclis sulbî oğlum es-Seyyid Ali nâm sagīr bi-hakkı’l-hıdâne vâlidesi mezbûre Hafîze’nin hacr ve terbiyesinde olup lâkin mezbûre Hafîze yabanlarda kalıp sagīr-i mezbûru leyl ü nehâr mahalle-i mezbûre sûkunda bırakıp ziyâ‘ ihtimâli gālib ve benden gayrı velî-i uhrâsı olmamağla sagīr-i mezbûru bana teslîme mezbûre Hafîze Hatun’a tenbîh olunmak matlûbumdur deyü da‘vâ ol dahi bi’l-külliye inkâr etmeğin istikşâf-ı hâl için mahalle-i mezbûre ahâlisinden İmâm Ali Efendi b. Hüseyin ve Bostanî el-Hâc Mehmed b. Osman ve es-Seyyid Ahmed b. Ali ve es-Seyyid el-Hâc Mehmed Said b. Abdullah ve Mehmed Emin b. Abdurrahman nâm kimesneler li-ecli’l-ihbâr meclis-i şer‘a hâzırûn olup istihbâr olundukda fi’l-hakīka mezbûre Hafîze yabanlarda kalıp sagīr-i mezbûru leyl ü nehâr mahalle-i mezbûre sûkunda bırakıp ziyâ‘ ihtimâli gālib ve hâdıne-i uhrâsı olmadığını herbiri alâ tarîki’ş-şehâde haber vermeleriyle mûcibiyle sagīr-i mezbûru babası ve velîsi es-Seyyid Ali’ye teslîme mezbûre Hafîze’ye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 5 min-Z sene 1206.