Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 845 Hüküm no: 1426 Orijinal metin no: [118b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uygunsuz hareketleri haber verilen Zeliha bt. Osman ve kızı Ümmügülsüm’ün mahalleden çıkarılmaları Ma‘rûz Medîne-i Üsküdar’da Şücâbağı mahallesi imâmı Ali Efendi b. Mahmud ve Müezzin Molla Osman b. Mehmed ve cemâ‘atinden Mehmed b. Hasan ve Halil b. Halil ve Mehmed b. Ali nâm kimesneler ile nisâ tâifesinden Habibe bt. Mehmed ve Ümmügülsüm bt. Mahmud ve Fatıma bt. Mehmed nâm hatunlar mahfil-i Bâb’da meclis-i şer‘-i hatîrde mahalle-i mezbûrede müstecireten sâkine Zeliha bt. Osman ve kızı Ümmügülsüm bt. Mehmed nâm hatunlar mahzarlarında mezbûretân Zeliha ve Ümmügülsüm’den herbiri hadîdetü’l-lisân olup dâimâ bizlere şütûm-ı galîza ile şetm ve ırzımızı hetk âdet-i müstemirreleri olup ve nâ-mahrem kimesneler menzillerine geldiğinden mâ‘adâ hâzırûn bi’l-meclis Ahmed b. Mustafa ve vâlidesi Ümmügülsüm bt. Halil ve zevcesi Hadice bt. Mustafa’ya dahi elfâz-ı kabîha ile şetm etmeleriyle bi’l-külliye emn ü rahatımız meslûb olmuşdur deyü teşekkî ve mahalle-i mezbûreden ihrâc olunmak bâbında fermân-ı âlîleri sudûrunu istid‘â eyledikleri bi’l-iltimâs huzûr-ı âlîlerine i‘lâm olundu. Fî 24 min-M sene 1207.