Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 846 Hüküm no: 1427 Orijinal metin no: [118b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Feyzullah b. Ahmed’in Karamürsel nahiyesindeki bağını haksız yere zabteden kardeşine açtığı davada, davalının söz konusu bağı davacıya teslim etmesine karar verildiği Ma‘rûz Medîne-i Üsküdar’a muzâfe Karamürsel nâhiyesinde sâkin zikri âtî sâhib-i arzuhâlin li-ebeveyn karındaşı olup derûn-ı arzuhâlde ismi mezkûr Feyzullah b. Ahmed medîne-i mezbûrede mahfil-i Bâb’da meclis-i şer‘-i hatîrde zikri âtî bağa vâzı‘ü’l-yed olan karındaşım İbrahim mahzarında emlâkimden olup nâhiye-i mezbûrede vâki‘ bir tarafdan el-Hâc Osman ve bir tarafdan el-Hâc Ali ve bir tarafdan Keleş Mehmed bağları ve bir tarafdan tarîk-i âm ile mahdûd tahmînen üç dönüm mikdârı bir kıt‘a kürûmu mülk bağıma karındaşım mezbûr İbrahim bi-gayrı hakkın vaz‘-ı yed etmekle tenbîh olunmak matlûbumdur deyü da‘vâ ol dahi cevâbında zikr olunan bağa vaz‘-ı yedini ikrâr lâkin müdde‘î-i mezbûr bundan akdem bağ-ı mezkûru yüz otuz iki guruşa bana bey‘ ve temlik ben dahi iştirâ ve temellük ve kabûl ve semeni olan meblağ-ı merkūm yüz otuz iki guruşun elli iki guruşunu müdde‘î-i merkūmun emriyle dâyini gāib ani’l-meclis dâmâdı es-Seyyid Ahmed’e edâ ve teslîm ve bâkī seksen guruşu dahi âhar dâyini olup dokuzuncu sekbânların mütevellisi işbu hâzır bi’l-meclis Nasû‘ (Nasuh) Odabaşı b. Yusuf nâm kimesneye seksen guruş deyni olup üçümüz bir meclisde olduğumuz hâlde müdde‘î-i mezbûr deyn-i mezkûr ile mütevellî-i mezbûru benim üzerime havâle-i mukayyede ile havâle ve herbirimiz havâleyi kabûl edip hattâ bağ-ı mezkûru deynim olan seksen guruş mukābilesinde mütevellî-i mezbûra vefâen bey‘ edip ol-vechile bağ-ı mezkûr mülk-i müşterâm olmağla bi-hakkın vaz‘-ı yed ederim deyü ba‘de’d-def‘ ve’l-inkâr dâfi‘-i mezbûr def‘-i mezkûrunu beyân için ba‘de’l-istimhâl ve’l-imhâl müddet-i mehl tamam ve birkaç gün dahi mürûr edip bir vechile def‘ini isbâta kādir olamayıp tahlîfe dahi tâlib olmamağla mûcibiyle zikr olunan bağa müdâhale etmeyip mezbûr İbrahim def‘ini isbât yâhûd müdde‘î-i mezbûr tahlîf oluncaya değin bağ-ı mezkûru müdde‘î-i mezbûr Feyzullah’a teslîm eylemek üzere mezbûr İbrahim’e tenbîh olunduğu ba‘de’t-tescîl bi’l-iltimâs huzûr-ı âlîlerine i‘lâm olundu. Fî-gurreti M sene 1207.