Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 847 Hüküm no: 1429 Orijinal metin no: [119a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan İstefan’ın satın aldığı üzümden ettiği zararı karşılaması talebiyle açtığı davada sulh olduğu Ma‘rûz Medîne-i Üsküdar’da Rum Mehmedpaşa mahallesinde vâki‘ Şems Ahmed Paşa Bağçesi demekle arîf bağçede bağçevân olup arzuhâl eden İstefan v. Yorgi nâm zimmî medîne-i mezbûrede mahfil-i Bâb’da meclis-i şer‘-i hatîrde Ahmed Ağa b. Mehmed mahzarında mezbûr Ahmed Ağa medîne-i mezbûreye muzâfe Kartal nâhiyesine tâbi‘ Pendik karyesinde vâki‘ beş kıt‘a bağının hora ve çavuş üzümünü bin iki yüz altmış guruşa bana bey‘ ben dahi ba‘de’l-iştirâ meblağ-ı merkūm bin iki yüz altmış guruşun bin guruşunu kendiye edâ ve iki yüz altmış guruşu zimmetimde bâkī kalıp zikr olunan üzümü âhara bey‘ esnâsında üzüme narh ile tenbîh olunduğuna binâen beş yüz guruş zarar etmemle mezbûr Ahmed Ağa’dan taleb ederim deyü tasaddî eylediği da‘vâsından bâ-tavassut-ı muslihîn kat‘a li’n-nizâ‘ yetmiş guruş bedel-i makbûza sulh olup husûs-ı mezkûra müte‘allika âmme-i de‘âvîden mezbûr Ahmed Ağa’nın zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 23 min-M sene 1207